Cuerpo di Polis conhunto cu ATA y Cruz Cora firme den compromiso pa garantisa siguridad riba nos beachnan durante Pasco Grandi.
Iniciativa di Gabinete AVP-Futuro
Anticipando e temporada druk di campamento durante e siman di Pasco Grandi, Minister di Turismo, Transporte y Labor mr. Wendrick Cicilia a yama un reunion di caracter di urgencia. Minister mr. Wendrick Cicilia, hunto cu Prome Minister, mr. Mike Eman, Altocomisario di Polis Ramon Arnhem, representante di Aruba Tourism Authority (ATA) y Aruba Hotel and Tourism Association (AHATA) a reuni pa traha un plan di maneho integral di siguridad pa proteha tanto nos comunidad como nos bishitantenan durante e dianan druk nos dilanti.
Patrick Melchiors, ATA Destination Services Manager, a enfatisa e papel crucial cu ATA y AHATA ta hunga den proteccion di nos industria turistico. Turismo ta keda e pilar di nos economia y siguridad di nos huesped ta un prioridad. Na 2024, hunto cu AHATA, ATA a lansa e Tourism Security Patrol Aruba (TSPA) un ekipo di 12 patrol officers cu ta patruya riba bicicleta y na pia den e area turistico. Esaki ta fundamental den temporada cu ta mas druk den area di nos beachnan. Melchiors ta reafirma e compromiso di ATA pa financieramente sostene e Aruba Hospitality and Security Foundation, cu ta reforsa e obhetivo comun pa mantene Aruba sigur y atractivo.
Altocomisario Ramon Arnhem a subraya cu siguridad ta un esfuerso colectivo y ta comprometi pa traha man na man cu tur stakeholder relevante. Prevencion, colaboracion, supervision y contacto continuo cu e comunidad ta esencial pa mantene nos isla sigur. Altocomisario tin tur confiansa cu e comunidad Arubano lo celebra e siman di Pasco Grandi den union familiar y den un ambiente sigur.
Di su banda, Dionisio Richardson, Coordinador di Actividadnan di Cruz Cora Aruba, a indica cu durante e siman di Campamento, boluntarionan di Cruz Cora lo ta presente den nan post strategico na San Nicolas, Oranjestad y Palm Beach, y lo amplia su presencia na Baby Beach pa responde na e demanda. Cruz Cora lo traha di cerca cu KPA pa duna asistencia inmediato den caso di emergencia. Richardson ta urgi tur mayor pa vigila cu atencion e muchanan y usuarionan di lama pa preveni incidentenan lamentabel.
E reunion a conclui cu un sentimento di cooperacion y determinacion pa proteha e bienestar di tur habitante y bishitante di Aruba. Gobierno di Aruba y su partnernan ta uni den e meta comun: un Aruba sigur pa nos tur!
