Dialogo riba documentario “Dande di Aruba”

“Dande di Aruba” ta un documentario bou direccion di e cineasta Cindy Kerseborn (dfm). Den e documentario cinematografico aki por mira diferente aspecto di e desaroyo di nos tradicion di Dande na Aruba. Dande ta un tradicion tipico di fin di Aña na Aruba, cu tanto grandi como chikito ta identifica nan mes cune como parti di nos cultura.

Dande ta un celebracion cu probablemente a cuminsa den siglo 19 y durante e transcurso di aña hopi hende kier sa ta kico ta e origen di Dande? Pero tambe kico nifica e palabra Dande? Y si Dande a y ta exsisti solamente na Aruba?
Pa e motibo aki Universidad di Aruba hunto cu Comision Nacional pa UNESCO di Aruba y Fundacion Mi Cutisa ta tene un dialogo entre publico y algun persona cu a contribui na produccion di e documentario.
Ruby Eckmeyer, Alexis Tromp y Arthur Kelly lo duna un presentacion di e proceso- y retonan cu nan a confronta pa por a produci un documentario cinematografico riba nivel profesional. Adi Martis lo duna un discurso historico riba investigacion di e historia di Dande. Y na final lo bay dialoga hunto cu e publico presente riba e Convenio di UNESCO pa por pone Dande riba e Lista Representativo di Herencia Cultural Intangibel pa Humanidad.

Esaki ta e comienso di un dialogo cu e comunidad di Aruba pa envolvi nos hendenan den e discusion pa identifica kico tur nos ta indica como parti di nos herencia cultural intangible. A base di identificacion di e elementonan cu comunidad di Aruba ta reconoce di importancia como parti di nos herencia cultural, lo por bay stipula un Lista Nacional di Herencia Cultural Intangibel di Aruba. E lista aki ta di suma importancia pa por consientisa nos pueblo kico tur mester haci pa proteha nos herencia cultural intangible.

E dialogo aki ta tuma luga na Universidad di Aruba den sala A y tambe virtualmente via e link: https://www.ua.aw/events/documentary-dande-di-aruba/
Orario: 6:00 pm – 8:00 pm
Dialuna: 28 di maart, 2022
Entrada: gratis