Premionan di estimulo copa Hubenil Gobernador Felipe B. Tromp

Anualmente ta otorga e premio Copa Hubenil Gobernador Felipe B. Tromp na un hoben of organisacion hubenil cu a destaca durante e aña anterior. E logronan por ta riba tereno social, cultural y deportivo. E logronan por ta premionan gana, pero tambe esfuersonan pa traha riba propio formacion y tambe haci trabou boluntario den comunidad bou guia di lidernan adulto.

Fuera di e premio grandi, e comision ta otorga tambe un premio di estimulo. Manera e palabra ta bisa, pa stimula e hoben of organisacion pa sigui cu e bunita trabou.

Den categoria di Premio Pre Hubenil, esta di ocho pa diesdos aña e premio di estimulo ta bay pa Melaiska Woodley di diez aña.

Melaiska a nace na Hulanda di descendencia Haitiano y ta biba na San Nicolas cu un amor grandi pa e cultura di Aruba.

Su talentonan ta modela, baile, basketball y atletismo y ta un mucha inspirador den su bario.

El a  haya e bunita reconocemento cu un mural na San Nicolas, esta un pintura di su persona riba un muraya realisa pa e artista Sabotaje Al Montaje den cuadro di e Proyecto Aruba Art Fair.

E ta conoci den su bario pa ta un fuente di inspiracion pa otronan.

Melaiska Woodley

Mural na San Nicolas di Melaiska Woodley

Den categoria Hubenil tin cuatro hoben cu ta ricibi e premio di estimulo. Nan ta Phelan Tromp y Rashid Ruiz di Grupo Scout San Dominico, Christianne Semerel di Grupo Scout Santanero y Jaylan Ridderstaat di Grupo Scout St. Paulus Michael.

Phelan y Rashid ta miembro activo di Grupo Scout San Dominico Noord desde 2012, esta for di edad di cinco aña. Nan a drenta como bevers y a pasa den tur unidad cu e programa di scout ta ofrece na e mucha- y e hobennan segun e filosofia di Lord Baden Powell. Awo nan tin diesdos aña miembro di Grupo Scout San Dominico Noord.

Como un bon scout no solamente nan a participa na e encuentronan di scout of actividadnan oficial, pero tambe a bay pa retonan grandi. Tur esakinan ta yuda nan den nan formacion pa bira hoben y adultonan responsabel y cu disciplina. Tambe nan mester por duna prome auxilio (EHBO). Nan a participa hunto cu otro miembronan di scout na diferente actividad social, cultural y deportivo na Aruba. Por menciona Fiesta Rotaria, Aruba Doet, procesion na misa, yuda parti awa ora di caminata, etc.

Despues cu nan a obtene nan insigne di “eerste klas verkenner” na 2023, nan a dicidi pa bay pa e reto pa logra e insigne maximo cu “kroonverkenner”. Pero debi na nan edad, nan mester a pasa pa e siguiente unidad cu ta “kroonexplorer”. E insigne aki ta esun di mas halto cu directiva di Scouting Aruba ta otorga. Pa logra esaki Phelan y Rashid mester a cumpli cu cierto exigencianan durante un proceso bou guia di Hopman Rudolf Angela. Esaki a encera campamento den mondi memey di bestianan manera boa durante 48 ora, hike 32km campando 2 anochi, core 64km riba biscicleta campando 2 anochi,  y describi nos flora y fauna, sobrevivi den mondi cu cuminda senciyo, organisa un expedicion di campamento, haci trabou boluntario di mas di 45 ora y hopi reto mas.

Tabata un trayecto extenso, pero e hobennan a persevera y dia 27 di april proximo nan lo ricibi nan insigne di “kroonexplorer”. Lo ta pa prome biaha cu Scouting Aruba den binticinco aña di existencia ta bay entrega e distincion di honor aki na dos hoben

Rashid Ruiz & Phelan Tromp

Otro dos hoben cu lo ricibi un premio di estimulo ta Christianne Semerel di Grupo Scout Santanero y Jaylan Ridderstaat di Grupo Scout St. Paulus Michael.

Nan tur dos ta co-presidente di nan unidad explorer. Esaki ta encera yuda organisa campamento y e trabou ta encera preparacion, cumpra material, ehecucion na e sitio y vigila e beneficio y desaroyo di cada miembro presente. Traha hunto pa logra mas hopi ta e meta.  Cada dos luna ta organisa un campamento cu ta cuminsa diabierna atardi 6or y ta sigui te diadomingo 12or di merdia.

E dos hobennan menciona ta forma parti tambe di e drumband di nan unidad scouting. Y nan ta considera un honor pa toca na varios ocasion special den nos comunidad. Nan ta envolvi pa yuda organisa biahenan pa exterior di scouting. Aki Christianne a haña e oportunidad di pa topa cu promedio 45 mil scouts di tur parti di mundo cu a bini hunto pa celebra hermandad scout representando Aruba. Nan a logra tecnicanan scout door di participa na 7 campamento pa un total di 24 dia unda nan a haci cu nan Unidad y Ekipo a resulta esun cu a campa mas biaha den 1 aña. Christianne a logra 6 insigne y Jaylan a logra adkeri 4 di e Insignenan. Nan ta dedica como ocho pa dies ora pa siman na scouting fuera di ta hobennan cu ta bay scol tur dia. Sin duda hobennan disciplina cu por ta inspiracion pa otronan pa dedica nan tempo liber na nan desaroyo personal pa bira lidernan ehemplar di nos pais den futuro. E hobennan aki a realisa esaki riba propio iniciativa den nan grupo. Na es momento Christianne y Jaylan ta actualmente na Orlando Florida bou di guia di Explorer Leider Christopher Lake, unda cu Jaylan lo realisa su di 5 insigne. Un ehempel di reconoce pa stimula mas hoben pa tuma accion pa siña mas door di ehecuta nan metanan pa haci un diferencia positivo pa otro. Christianne y Jaylan lo ricibi nan premio di estimulo despues cu nan regresa di nan biahe. Phelan y Rashid lo ricibi nan premio di estimulo riba Dia di Rey for di Gobernador di Aruba.

Christianne Semerel & Jaylan Ridderstaat