Partido MEP: Negosiacion cu Hulanda no tabata un “lopende zaak”

DEBI NA E TARDANSA DI E FORMACION DI E GOBIERNO AVP-FUTURO Y FALTA DI LIDERASGO, ARUBA LO SUFRI E CONSECUENCIANAN

ORANJESTAD –  Diahuebs mainta, Aruba a lanta cu e noticia cu Secretario di Estado Zsolt Szabó a anuncia cu e interes riba e debe di covid lo subi, mirando cu no tin acuerdo dia 1 di Mei 2025. Parlamentario Evelyn Wever-Croes a expresa cu e noticia aki ta straña su persona  mirando cu riba e prome dia di gobernacion di Gabinete AVP-FUTURO, señor Mike Eman, den parlamento riba 28 di Maart, a declara cu su persona lo bay di acuerdo cu e rijkswet. Y si e dia aki su persona tabata di acuerdo pa acepta e rijkswet dicon awe ainda nada no ta firma, mirando cu Secretario di Estado Szabó tabata na Aruba dia 8 di April 2025.

Durante su bishita Secretario Szabó tambe a bishita Parlamento, na unda tur miembro di Parlamento a pidi un “update” di e status di negosiacion. Riba e peticion aki, Secretario di Estado Szabó no a duna contesta y a inidca na Parlamento pa yama e gobernantenan aden pa duna e informacion riba esaki. Desde e dia aki Parlamento ta pidiendo Gobierno pa bin duna informacion riba e negosiacion cu Hulanda pero ainda no a logra di haya e atencion necesario di nan.

Parlamentario Wever-Croes a indica cu e anuncio di subida di e interes riba e debe di covid ta logico, paso si como Gobierno bo no ta tuma responsabilidad, bo no ta mustra lidersago, y bo no ta tuma decision, esaki ta e resultado cu bo lo haña.

“Mi ta lamenta cu algun media a dicidi di ataca Gabinete Wever-Croes II riba esaki. Nos a laga tur cos cla, esaki no tabata un “lopende zaak”. E formacion di Gabinete AVP-FUTURO a tarda demasiado largo, pues no bin culpa MEP aworaki, no bin sconde bou di nos saya. Nos a laga e menu atras cu dos opcion, y e unico cos cu AVP-FUTURO mester a haci ta sinta, tuma decision y actua segun e decision. Pero ainda nos ta wardando pa e Gobierno aki tuma lidersago y mustra responsabilidad” Parlamentario Wever-Croes a expresa.