Minister Geoffrey Wever: Delegacion di Aruba den reunion cu Citibank, Fitch, Moody’s y Standard & Poor’s

Washington D.C., 24 di april 2025 – Awe, Minister di Finansa, Economia y Sector Primario, Geoffrey Wever, hunto cu e delegacion consistiendo di Zulema Erasmus, Maria Dijkhoff Pita, Chito Paris y Emeliën Kelly, a sigui cu su serie di reunionnan financiero importante na Washington D.C.  Un encuentro hopi agradabel tabata cu Sr. Hasanali Mehran cu a ofrece un lunch na e delgacion di minister huntu cu repersentantenan di Banco Central di Aruba. Tabata un reunion unda  a recorda e rol importante cu Sr. Mehran tabatin na aña 1986 como prome presidente di CBA y su susesivo asistencia e añanan despues y a combersa riba e status di economia y finansa di Aruba.

E delegacion a bishita Citibank, un di e institucionnan financiero mas grandi di mundo. Tambe a tene encuentro cu dos di e tres agencia principal di rating internacional: Moody’s y Standard & Poors. Diahuebs caba e delegacion a reuni cu e tercer agencia; Fitch Ratings. E reunionnan aki ta forma parti di e trayecto di representacion y actualisacion di Aruba su perfil financiero.

Kico ta un rating agency su importancia pa Aruba?

Agencianan di rating ta instancianan independiente cu ta analisa e capacidad di un pais (of empresa) pa paga su obligacionnan financiero. Nan ta evalua riesgo financiero, stabilidad economico y maneho fiscal, y ta atribui un rating – un clase of categoria – cu ta sirbi como guia pa inversionistanan internacional.

Pa Aruba, cu ya hopi aña ta presente den mercado di capital internacional, esaki ta fundamental. Aruba a drenta e mercado di capital hopi aña pasa, ora cu a busca financiamento originalmente via ABN AMRO Hulanda, y posteriormente a wordo referi na ABN AMRO New York. E trayecto aki a pone Aruba den contacto directo cu inversionistanan di e mercado global, cual a conduci cu Aruba mester a busca rating agencies pa haci e evaluacion.

Desde esey, Aruba ta ricibi regularmente evaluacion for di tur tres agencianan prestigioso di rating, esta: Moody’s, Standard & Poor’s y Fitch.

Kico ta Aruba su rating actual?

Actualmente, Aruba tin un “investment grade rating” di tur tres agencia:

• Fitch: BBB- cu un outlook positivo. E upgrade di e rating, pa un investment grade, a tuma lugar e aña aki como resultado di nan bishita.
• Standard & Poor’s: BBB+ cu un outlook stabiel. Tambe ta mantene Aruba den nivel di investment grade den su clasificacion particular.
• Moody’s: Baa3 cu un outlook stabiel. Ta programa pa realiza un mision na Aruba e proximo siman pa actualisa nan rating; spera den e proximo luna.

Un rating ta directamente afecta e disponibilidad pa financiamento, pero tambe e rating – nivel di riesgo – ta determina e porcentahe di e fiansa. Mas abou e rating, ta nifica mas riesgo perscibi, cual ta nifica e tasa di interes (%) lo ta mas halto (pa acomoda pa e riesgo adicional), y pues un gasto di interes mas halto pa pais. Rating tambe ta importante pa inversionistanan cu ta busca pa inverti den sector priva.

Tin di nota cu aunke tur agencia ta clasifica Aruba den investment grade, nan ta uza diferente terminologia y metodologia pa describi e nivel di riesgo. E hecho cu Aruba ta mantene investment grade ta refleha un nivel di confianza den maneho fiscal y stabilidad economico di nos pais. Un bon relacion den Reino tambe ta un factor importante pa e agencianan di rating y tabata un topico den tur reunion.

Loke tambe ta resalta ta e cu e bon nomber di Aruba, cu ta un resultado di un esfuerzo colectivo di diferente profesionalnan Arubiano y diferente mandatarionan, y cu continuidad di gobernacion ta hopi importante.

Objectivo di e reunionnan

Durante e reunionnan cu e banconan y agencianan di rating e delegacion di Aruba a discuti:

• E estado actual di nos economia y presupuesto
• E desaroyonan internacional cu por impacta Aruba
• E strategianan pa reforsa sostenibilidad financiero den futuro

Minister Wever a enfatiza cu mester mantene un dialogo continuo cu agencia di rating y banconan internacional. Ta crucial pa preserva acceso faborabel na mercado di capital y pa yuda Aruba den su trayecto pa un maneho financiero responsabel y sostenibel.