Partido MEP: PARLAMENTARIO WEVER-CROES A FIRMA E REGISTRO DI CONDOLENCIA PA PAPA FRANCISCO

ORANJESTAD – Diahuebs ultimo Parlamentario Evelyn Wever-Croes hunto cu Parlamentario Xiomara Maduro a bishita Pro Cathedral San Francisco pa firma e registro di condolencia pa Papa Francisco.

Parlamentario Wever-Croes a expresa cu Papa Francisco tabata un bon Papa y hopi stima rond mundo paso e tabata un lider carismatico y un bos pa esnan cu no tabata tin bos. Papa Francisco a purba di trece hopi cambio den e iglesia catholico pero lamentabelmente e no a logra tur e cambionan cu e tabata desea.

Si tin dos palabra cu ta tipifica Papa Francisco, ta amor y compassion, y esey ta bisto den e tristesa cu ta reina rond mundo pa cu su partida. Parlamentario Wever-Croes a expresa cu pa su persona tabata un privilegio di por a atende un audiencia cu e Papa 6 aña pasa na Vaticano, na unda el a conta Papa Francisco di nos Birgen Maria y na unda Papa a duna un bendicion special pa pais Aruba.

“Papa Francisco semper a pidi pa nos resa p’e. P’esey awe ban uni den oracion y resa pe. Cu papa Dios tum’e den su Reino, cu Papa Francisco sosega na paz y cu Dios guia e iglesia catolico den e transicion”Parlamentario Wever-Croes a expresa.