Partido MEP: GERLIEN MESTER STOP DI COLGA NA SAYA DI EVELYN

ORANJRESTAD – Riba su mes e ta un honor cu Gerlien kier colga na saya di nos lider di partido pasobra cu e legado cu Evelyn Wever Croes ta laga atras ta grandi. Y Gerlien basicamente ta confirma esaki.

Pero ora cu bo kier purba na atacha e legado aki, bo ta cay den bashi pasobra Evelyn a crece di un Prome Minister pa un Estadista prominente y respeta den henter Reino Hulandes. Gerlien cu a penas a cuminsa, tin cu cuminsa skirbi su propio trayectoria cual pa colmo a conoce un salida bon manca.

Evelyn Wever Croes ta un lider cu nunca ta cansa, cu hasta ora tur ta drumi, e ta sigui labora.

Cu e mesun energia incansabel aki nos Lider Evelyn Wever Croes a negocia cu Hulanda na interes di Aruba y nos Pueblo. Ora cu tur otro a grita: “firma pa caba loke cu Hulanda a exigi”,  Evelyn Wever Croes a pone pia abou cu e si lo no ta esun cu lo pone su firma bou un documento cu lo malogra e futuro di Aruba. Nos Lider a kere den su mes, den e profesionalnan di Aruba, den e potencial di nos pais y den e resiliencia di nos pueblo. Y cu e energia aki, team Aruba profesionalmente a sigui negocia cu Hulanda pa Aruba su maximo beneficio.

Finalmente danki na e insistencia di Evelyn Wever Aruba, 21 di februari ultimo e Rijkswet a wordo bari for di mesa. Conseho di Minister di Reino a dicidi di trek in e ley di RAft (Rijkswet Aruba Financieel Toezicht). Lider di Partido a indica cu e Raft tabata e condicion cu Hulanda a pone pa por a yuda Aruba atraves di e pandemia. E tempo ey Gobierno tabata sa di un principio cu esaki no tabata bon pa Aruba y desde e momento ey a cuminsa negocia riba dje y pa a logra kita e ley aki for di mesa.

Gabinete Wever Croes a laga tur cos cla atras pa e Gobierno nobo. Pero pa nan propio incompetencia, awo Gerlien kier sconde bou saya di Evelyn en bes di asumi su responsabilidad como vice prome Minister y e minister encarga cu relacionnan den Reino. Kier tira culpa riba Evelyn mientras cu t’abo ta den Gobierno. Pues Gerlien mester demostra awor cu e por y cuminsa goberna pa caba.