Encuentro positivo entre Gobierno di Aruba hunto cu Eerste y Tweede Kamer
Dialuna 28 di april, Prome Minister di Aruba, mr. Mike Eman, hunto cu Minister di Relacionnan di Reino, mr. Gerlien Croes, a ricibi Presidente di Eerste Kamer Hulandes, Jan Anthonie Bruijn, y Presidente di Tweede Kamer Hulandes, Martin Bosma. Durante e reunion a dialogo riba varios tema di importancia pa Aruba y Reino Hulandes.
Prome Minister Mike Eman a indica cu e reunion a duna oportunidad pa presenta e vision di e gobierno nobo na e delegacion Hulandes. Prome Minister Eman a pone enfasis riba e rol strategico cu Hulanda por tin den desaroyo di Aruba, stimulando un relacion di win-win, manera a haci den pasado cu institutonan renombra manera KLM, Schiphol, Philips, Rietveld, y TNO. Esaki por crea un uistralingseffect pa Aruba na Hulanda, pa atrae mas instituto y empresa di prestigio cu por tin un participacion activo den futuro di nos isla.
Prome Minister Eman tambe a anuncia cu otro siman, Wageningen University lo ta na Aruba pa aporta na e desaroyo agricola, un area di prioridad pa diversifica nos economia. E compromiso pa inverti den relacionnan di Reino ta un paso firme pa logra mas stabilidad politico y apertura di oportunidadnan nobo pa tur Arubiano.
Relaciona cu e discusionnan riba e Rijkswet, Prome Minister a enfatisa cu aunke e gobierno apenas tin un luna na poder, a entrega tur documento necesario prome cu 1 di mei y ta spera cu Gobierno Hulandes lo reconoce esaki y tene na cuenta cu e atraso di pasado no ta responsabilidad di e gobierno nobo, sino un herencia administrativo cu awe nos ta traha pa cambia.
Minister di Relacionnan di Reino mr. Gerlien Croes a duna di conoce cu tin gran interes di banda di Hulanda pa fortalece e cooperacion den Reino. Mester duna mas contenido y balor na e relacionnan den Reino y ta sinti cu tin apertura nobo pa traha efectivamente hunto.
Presidente di Eerste Kamer, Jan Anthonie Bruijn, a cualifica e encuentro como un “intercambio di pensamento productivo y constructivo.” A referi na e importancia di e Comision KOREL (Comision di Relacionnan di Reino) y Comision di Defensa den luz di e cambionan geopolitico actual. “E relacion ta bon, y lo sigui fortifica esaki. Specialmente den e tempo di tension mundial, un relacion fuerte entre nos paisnan ta di suma importancia,” Bruijn a declara.
Presidente di Tweede Kamer, Martin Bosma, a pone enfasis riba e crecemento turistico di Aruba y e manera cu Hulanda por siña di nos exito. Aruba kier expande e prosperidad di e sector turistico pa yega cerca e comunidad completo y no solamente cerca e operadornan. Ademas a intercambia pensamento riba otro industrianan cu por promove na Aruba, manera e industria hi-tech agricola, mirando e clima di secura cu tin na Aruba.
E reunion a tuma luga den un ambiente positivo y di respet mutuo, subrayando un futuro promotedo pa e relacion den Reino di Hulanda.
