MINISTER ENDY CROES A RICIBI PRESENTACION Y INFORMACION DI UN PROYECTO DI BEACH TENNIS ARUBA

ORANJESTAD:  Recientemente den un encuentro agradabel e Mandatario di Enseñansa a reuni cu representantenan di Beach Tennis Aruba. Sr. Sjoerd de Vries a elabora riba un proyecto cu nan ta desea di realisa na Aruba, cu ta consisti di ocho cancha di tennis y ta desea di por conta cu e sosten di e Mandatario di Deporte. Minister Endy Croes a expresa cu ta un proyecto hopi bunita y cu nan a pidi nos pa duna un conseho y nos vision pa cu e deporte di tennis y pa sondea e posibilidadnan pa cu un tereno pa cu e deporte aki.

E Mandatario a sigui bisa cu e ta un proyecto positivo y nan por conta cu su sosten. Segun sr. de Vries tin inversionistanan ta cla pa inverti den e bunita proyecto aki pa nos pais. Finalisando e Mandatario a expresa cu tur proyecto positivo deportivo pa cu bienestar general di Aruba por conta cu e sosten di Ministerio di Deporte. Beach Tennis Aruba por conta cu e guia y contactonan necesario pa cuminsa nan por cana e proceso pa haci e bunita proyecto aki un realidad.