Centro di ciudad porfin birando bek limpi

Dialuna dia 28 di april, Minister di Husticia mr. Arthur Dowers, hunto cu DOW y algun ploeg di limpiesa, a duna inicio na un accion di limpiesa den centro di ciudad. Despues di a constata varios caya den cual e cantidad di sushedad a bay for di man y yerba a crece di forma incontrola, Minister Dowers den capacidad como Minister di Obra Publico interino, a dicidi di tuma accion inmediatamente y e ploegnan a cuminsa haci e caya di Columbusstraat y Wilhelminastraat limpi. E ploegnan di limpiesa, den coordinacion cu DOW, den apenas algun ora a haci e caya completamente limpi, kitando yerba y desperdicio cu tabata acumula riba acera.

E accion aki a haya hopi bon acogida cerca esnan cu ta biba den e area. Segun Christino Suarez, habitante den Wilhelminastraat, ta hopi tempo cu e no ta wak ningun hende ta haci e luga limpi. Mainta cu a sali for di cas, a nota un diferencia grandi den e caya completo. E ciudadano aki mes ta percura regularmente pa tene dilanti di su propiedad limpi y ta urgi pa cada hende tuma un rol mas proactivo den mantene dilanti nan propiedad limpi.

Luciano Fuentes, cu ta traha cu un ploeg di limpiesa ta contento cu e accion di Minister pa haci e luga limpi. Mantencion di Aruba ta un responsabilidad di un comunidad completo, y no solamente di Gobierno. Tanto bal istancianan di Gobierno haci limpi awe anto den dos dia, e mesun hendenan ta bolbe tira sushedad riba caya. Fuentes ta contento cu a asigna e ploegnan di limpiesa pa haci Centro di Ciudad limpi, paso ta un area na unda un cantidad di turista ta frecuenta. Unabes cu caba cu e area aki, lo sigui den otro cayanan den centro di ciudad.

Diamars trabao a sigui den Wilhelminastraat, na ex-warda di Polis na Oranjestad caminda un team di DOW hunto cu Bureau City Inspector, a haci un limpiesa riguroso den e cura, na unda a bay cu diferente bicicleta, matras y otro artefactonan bandona.

Marksonn Maduro, empresario na Plaza Daniel Leo, ta contento cu Minister Dowers a bin cu e plan di accion aki, paso ta hopi aña a transcuri sin cu a wak un instancia haci trabao di limpiesa den e area comercial aki. Downtown ta nos caya principal na unda e turista kier experencia nos cultura y unda nos localnan ta frecuenta, pero den un ambiente limpi.