CAMBIO DI CONTENIDO Y TITULO DI COMUNICADONAN MANDA PA PRENSA TA FALTA DI ETICA Y PROFESIONALISMO
Alabes e ta cambia e esencia di e comunicadonan

Prome Minister Evelyn Wever-Croes:

Durante Conferencia di Prensa dialuna mainta, despues cu Prome Minister Evelyn Wever-Croes a duna un splicacion amplio riba e procedura di suspension di un empleado publico, a splica con cierto prensa ta cambia contenido y titulo di comunicadonan manda.

Den fin di siman, despues di a tuma nota di e manera con oposicion a hiba e situacion di e empleado publico cu a wordo suspendi, Gobierno di Aruba a presenta un relato di prensa exactamente riba e parti cu Prome Minister a splica detayadamente di con e procedura ta na momento cu un empleado publico haye den situacionnan asina.

“Gobierno a saca un relato di prensa na unda nos ta bisa cu integridad no ta depende di genero. Integridad ta haci lo corecto. Lamentablemente nos a ripara cu un medio di comunicacion a cambia e titulo y e esencia y pa colmo a pone un mentira cu ta para cu e Griffier lo a pidi ami pa firma e carta. Pa colmo nos ta mira despues tambe cu Parlamentarionan ta reacciona riba e mentira aki pa purba hacie un berdad y cuminsa cuestiona ami riba dje”, Prome Minister a remarca.

Prome Minister a pidi e medio di comunicacion pa coregi esaki y nan a nenga di coregi. E titulo y articulo cu Gobierno a manda pa splica e procedura kico ta pasa ora cu bo tin un caso di integridad. E medio di comunicacion a haci cambio na e titulo cambiando e esencia di e berdad.

E titulo cu Gobierno a manda:
‘INTEGRIDAD NO CONOCE DISTINCION DI GENERO’. “Ora bo ta para pa integridad, bo mester actua, maske ta hendenan di bo propio partido”.

E titulo cambia di e medio di comunicacion:
MIN PRES; TA GRIFFIER DI PARLAMENTO A PIDI MI PA SUSPENDE LIESJE.

“Ningun caminda den e articulo ta poni cu un hende a pidi mi. Ningun hende mester pidi mi pa mi asumi mi responsabilidad. Esey tabata e esencia di e articulo. Ami ta akinan no pa ta popular sino pa mi carga mi responsabilidad”, Prome Minister a enfatisa.

E medio di comunicacion aki, despues cu Prome Minister a pidi nan pa cambia e titulo aki, nan a nenga y a contesta cu si Gobierno no paga, nan ta haci cu e articulo loke cu nan kier.

“Gobierno no ta paga pa ningun articulo pues el a keda asina. Mi ta keda di opinion si cu esaki ta contra etica y profesionalismo, pero e ta keda na e medio di comunicacion. Ami no ta akinan pa ataca, mi ta akinan pa mustra riba un hecho cu a sosode y mi ta kere ta importante pa henter Aruba sa pasobra e ta mi responsabilidad cu comunidad”, Prome Minister a duna di conoce.