Parlamentario Marco Berlis (MEP):
Gas Natural y LNG Gas ta sigui domina mundialmente
Desaroyonan ta keda pusha pa un cooperacion y expansion di LNG Gas pa Europa!
E situacion di e guera na Ukraina
Noticianan di gas natural y LNG Gas ta keda domina globalmente. Cu e guera intensificando na Ukraina y kico esaki ta representa pa e mundo ta obvio. Ukraina ta un di e productornan mas grandi na mundo di hariña, batata, rooi biet, azeta di sunflower, y ta abastece globalmente hopi productonan di agricultura. Fuera di esaki nan tin depositonan mineral na cantidad manera: hero, Mangaan, diferente tipo di carbon, titanium, bauxiet, mercurio, potassium, salo, fosfor y sulfur entre otronan. Hopi di e recursonan natural aki ta entre e depositonan di mas grandi di mundo. No ta nada straño cu Rusia ta desea Ukraina pa su mes. Asina Rusia por tin un influencia mas fuerte den e mundo y ta menos dependiente di otro nacionan.
E desaroyo aki ta preocupa mundo henter especialmente Europa cu ta asina dependiente di e suministro di e gas natural di Rusia. Recientemente Turkia a propone e idea pa traha un tuberia bao di lama cu ta cuminsa na Turkia y cu ta yega te na Israel su deposito di gas natural di mas grandi, cu yama Leviathan. E gas natural aki lo por wordo exporta e ora ey na e paisnan sur di Europa cu ta buscando pa diversifica y no kier ta dependiente di Rusia mas pa nan gas natural.
E desposito di gas natural Leviathan ya ta suministrando gas natural pa Israel, Jordan y Egipto. E doñonan di e deposito aki ta Chevron y e companianan di Israel NewMed Energy y Ratio Oil. Nan ta pensa di subi e produccion di gas natural di 12 pa 21 biyon di metro cubico pa aña.
Mayoria di e gas aki lo wordo procesa den LNG Gas pa wordo exporta pa Europa of Medio Oriente segun NewMed. E compania tin diferente opcion con pa transporta e gas natural aki di Israel pa Europa. Asina desaroyonan global ta keda centralisa alrededor di gas natural. Paisnan moderno y influyente usando gas natural ta compronde su beneficionan y stabilidad, ademas cu e ta hopi mihor pa nos medio ambiente compara cu HFO. Su costo tambe ta bastante menos cu HFO. Esaki ta traduci den menos gasto na fuel pa aña pa WEB Aruba NV y pais Aruba.
Asina aki pueblo por sigui e desaroyo global di gas natural. Pueblo, no keda scucha e desinformacion negativo di partidonan den oposicion cu ta opone na tur loke ta bon pa Aruba. Informacion y desaroyonan global ta e evidencia cu e decision pa cambia HFO pa gas natural ta logico y solido! Tempo lo sa di demostra esaki!