PROME REUNION ENTRE PROME MINISTER Y DEPARTAMENTONAN ENCARGA CU WATERSPORTS A TUMA LUGA
ORANJESTAD – Prome Minister Evelyn Wever – Croes a atende e reunion cu DIP a organisa cu e diferente departamentonan gubernamental y no-gubernamental cu ta encarga cu Watersports. E prome reunion aki a tuma luga mientras ta warda pa Ministerio Publico y Polis Maritimo finalisa e investigacion di e accidente lamentabel cu a tuma luga recientemente, cu a costa bida di un hobencita turista.
Premier Wever – Croes a splica cu tin varios idea cu a wordo treci dilanti for di locual ta biba den comunidad y ta sinti cu tin un deseo pa regula e sector aki mas. Tambe a tuma nota cu tin e deseo pa mira nos beachnan y nos playanan menos ocupa cu Watersports.
Hunto cu DIP, DOW, ATA, AHATA, Directie Scheepvaart y Strand Politie, a delibera y evalua con e situacion ta aworaki y mira con por mehora. “Gobierno ta tuma e situacion hopi na serio y kier ta sigur cu tin e siguridad di localnan y bishitantenan na prome luga.”
Concluyendo, Prome Minister a bisa cu el a haya e oportunidad pa combersa cu mayorman di e hobencita cu a fayece prome cu nan a bandona e isla y tabata un momento hopi doloroso. E mayornan tabata hopi afecta y sin consuelo. Di otro banda e mayornan toch ta agradecido cu e atencion cu a haya di Aruba. “Aworaki Aruba mester percura pa nos beachnan ta safe pa nos localnan y turistanan”, Prome Minister a termina bisando
