Parlamentario Ricky Hoek (MEP):
A haci entrega di un mocion pa reglamenta parkeo pa persona cu limitacion

Riba diaranson 30 di maart 2022, e prome dia cu Parlamento di Aruba a cuminsa trata e “Proyecto di ordenansa nacional cu ta establece e presupuesto di e ministerionan di nos pais pa aña 2022”, en corto bisa, e Ley di Presupuesto 2022. Riba e dia aki tabata na turno e respectivo Ministernan di Husticia y Asunto Social y Labor, Energia y Integracion. A base di e documento di presupuesto cu a keda presenta pa gobierno, mi persona a tuma tempo pa studia y analisa esaki. Mi a tuma nota cu den e parti di asunto social un grupo importante di nos comunidad lo mester haya un poco mas atencion. Esaki ta e grupo di persona cu limitacion.

Dicon e mocion aki ta importante?

E Tratado di Persona cu Limitacion di Nacionnan Uni tin como meta pa promove, proteha y garantisa e pleno goso di cada persona cu un incapacidad di e derechonan humano y libertadnan fundamental den condicionnan di igualdad y tambe promove e respet di su dignidad inherente. Un persona cu un incapacidad ta ser considera un persona cu deficiencia fisico, mental, intelectual of sensorial a largo plaso, cu durante interaccion cu diferente barera, lo por wordo impedi di participa na manera optimal, efectivo y den igualdad di condicionnan cu e demas di e sociedad. Inclusion y acceso di tur persona den sociedad na entre otro trabou, scol, transporte, cultura, deporte y otro actividadnan ta den liña cu e Metanan di Desaroyo Sostenibel di Nacionnan Uni. Desde 2007 e Plataforma pa Persona cu Limitacion (PPL) na Aruba ta bogando pa derecho di persona cu incapacidad y respet y uso adecuado di parkeo di persona cu incapacidad. E parkeonan pa persona cu incapacidad na diferente establecimento riba Aruba diariamente no ta wordo respeta y laga liber pa un persona cu incapacidad. Na e momentonan aki no tin un ley na vigor cu ta stipula e maneho, control y castigo di uso inadecua di parkeo pa personanan cu incapacidad. Ademas, e uso di e ‘gehandicaptenparkeerkaart’ segun articulo 28 inciso i y articulonan 28a te cu 28e di e Landsbesluit verkeersregels no por wordo usa na manera optimal door di un persona cu un incapacidad debi na e infrastructura corespondiente.

Kico ta e meta?

E meta cu mi a entrega e mocion aki ta pa urgi gobierno di Aruba pa cuminsa traha riba e aspectonan legal cu ta regarda e parkeonan pa persona cu incapacidad. Di e manera aki lo tin un ley cu ta stipula ken por haci uso di e parkeo pa persona incapacita. Si acaso e parkeo pa persona incapacita wordo uza door di un persona cu no ta incapacita, polis lo por actua y duna un sancion pa uzo di e parkeo indebidamente.