Aruba Marriott ta conta cu 113 trahado fiel keto bay den servicio
ORANJESTAD, Aruba – 23 di december 2022: “Nos ta hopi, pero hopi orguyoso di boso tur. Boso ta cu nos desde e prome dia. Mi sa cu boso a pasa diana fantastico y tin biaha hasta tin dianan menos bon, pero boso a sigui fiel na nos. E ultimo 26 añanan, boso ta e backbone di nos hotel”, asina Raoul Lemmerling, General Manager di henter e compleho di Aruba Marriott, a bisa na e ocasion aki. E ta contento di por ta na cabes di e compleho di hotelnan aki na Aruba, precisamente ora ta celebra e hecho cu a surpasa 25 aña di servicio, di inversionnan miyonario den nos economia, di a crea cuponan di trabou y di a atrae miles di turista cu a bira parti di e famia di Marriott y cu awendia casi ta sinti nan mes Rubiano caba, pasobra tur aña nan ta regresa.
E hotel tabata cla pa celebra nan 25 añanan di existencia na Aruba desde aña pasa na augustus, pero debi na pandemia a haya nan ta pospone e celebracion pa e aña aki. Lamentablemente atrobe, debi na medidanan impone, a bira dificil pa organisa un evento pa celebra e logro aki “como debe ser”. A percura pa hopi regalo y beneficio pa cada un di e trahadonan cu ta cu e hotel desde e prome huesped a pone un pia eyden y cu a sigui fiel te cu awe na Marriott.
“Pero, nos por laga e celebracion aki pasa bay sin mas y pesey a dicidi di pone hopi luz riba tur e trahadonan aki, pa henter Aruba cera conoci cu parti di e embahadonan di Aruba Marriott, esunnan cu ta carga e cultura di e hotel”, asina Ruthline Theysen, Complex Director of Human Resources a bisa cu un sonrisa riba su cara. El a sigui bisa cu no solamente e trahadonan aki ta forma e ehempel pa tur otro cu a bin despues, incluyendo su mes, pero e ta contento di anuncia cu un gran mayoria di nan no ta mirando bahamento cu pensioen tampoco den un futuro cercano. “Traha na Marriott no ta un trabou, sino bo ta forma parti di un famia grandi y esey ta locual ta atrae e trahadonan pa yega nan trabou tur dia cu un sonrisa riba nan cara, cla pa sirbi e huespednan di un manera excepcional”.
Un di e ehempelnan di hobennan Rubiano, cu a drenta e compania, sigui studia, sigui gana experencia tanto localmente como internacionalmente y cu awe ta carga responsabilidad grandi na Marriott ta Bernardo “Ben” Figaroa. Awendia e ta General Manager di Stellaris Casino y tin un cantidad di empleado resortando bou di dje. E hecho cu den casino tin un cantidad remarcabel di e 113 trahadonan cu ta trahando cu e hotel desde e prome dia, ta yen’e cu orguyo. El a yama cada un di nan “danki di curason” pasobra Figaria ta consciente cu pa traha den e mundo di casino no ta facil. Y pa traha pa mas di 25 aña sigui pa e mesun casino, trahando oranan largo, tin biaha te laat den marduga y lanta mañan caves pa trabou atrobe, ta demostra cu e ambiente na trabou mester ta bon. Figaroa ta considera e trahadonan cu ta cu Marriott desde principio ta e grupo cu por ta ehempel pa tur otro na Aruba den loke ta determinacion, dinamismo y lealtad na trabou.
Empleadonan fiel na Aruba
E compania ta considera e grupo di 113 empleado, cu a habri e hotel dia 31 di augustus 1995 y cu ta trahando te awe, como nan “charter team”. Na mundo, ora revisa tur e propiedadnan di Marriott, sin duda cu Aruba tin un di e nivelnan di mas halto di trahadonan fiel cu a keda cu e compania desde su apertura. No ta un desaroyo normal, pues e ta bisa algo di e forma con e compania ta trata su empleadonan, e compromiso cu e tin cu nan pa nan bienestar, progreso, educacion y crecemento den e compania. Charter Team di un compania ta e prome ekipo, cu normalmente ta esun cu ta habri e caminda, explora e miho forma di traha, crea protocolnan interno cu despues di 25 aña ainda ta vigente y ta percura pa un servicio sin igual, cu ta sigui atrae huesped pa e hotel.
Tocante Marriott Aruba
Aruba Marriott Resort & Stellaris Casino a habri dia 31 di augustus 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott & Stellaris Casino ta consisti di mas o menos 1200 empleado den servicio directo. E compleho di Aruba Marriott & Stellaris Casino ta esun di mas grandi den henter Caribe, tanto den cantidad di camber como den cantidad di empleado.
