Parlamentario Marco Berlis (MEP): AVP a perde tur contacto cu realidad!

Despues di dos anochi di debate intenso, tratando e Ley di Presupuesto 2022 diaranson y diahuebs anochi, fraccion di MEP a sigui Diabierna den sala di Parlamento hunto cu minister sr. Geoffrey Wever y tambe sr. Endy Croes. E reunion a cuminsa manera mayoria ta cuminsa, cu un tono trankilo, sinembargo eventualmente esaki a cuminsa cambia.

AVP a keda positivamente impreciona cu maneho di Gabinete Wever-Croes II

Tabata bergonsoso pa wak con parlamentario sr. Sievinger kier a “instrui” Minister sr. Geoffrey Wever con pa eherce su cartera. Gritando y insinuando cu e sa mihor y cuanto experiencia e tin. Net sr. Sievinger! Net e kier bin desmostra su “experencia” na un minister nobo cu ta eherciendo su trabao corectamente. Na su turno, minister sr. Geoffrey Wever a desplega un actitud excelente referiendo na tur hende, hasta e parlamentario aki cu ta bao investigacion. Minister Wever a papia ampliamente di su vision, kico tur nan ta haciendo, y atraves di esakinan el a demostra conocemento profundo y cu solucionnan grandi ta na caminda pa Aruba. Pa AVP su berguensa, nan a keda impreciona y a gaba e ideanan y trabao di minister sr. Geoffrey Wever. Durante Minister Wever su disertacion nan a scucha hopi bon y tawata sacudi cabes positivamente indicando di ta di acuerdo cu Minister Wever su maneho.  Durante e reunion nan tur por a wak y tende cu apesar cu nan a balote den principio, e tin mas conocemento cu nan y ta trahando mas duro cu nan a pensa.

Minister sr. Endy Croes na su turno tambe a prueba di ta cubriendo su ministerio cu efectividad y responsabilidad y ta “hands on” cu e problematica di e werksternan. Minister sr. Endy Croes a demostra den e seis lunanan aki di ta un minister proactivo, dinamico, un intermediador efectivo, un minister cu vision y cu ta trahando duro pa Aruba. Minister sr. Endy Croes su contestacion di mas di 100 pregunta tabata excelente y a desplega conocimiento profundo di su vision y ministerio. E tambe a wordo elogia pa oposicion pa su contestacion profesional den e prome tanda y desplego di trabaonan haci te aworaki.

AVP: Diripiente a lubida di e crudo realidad cu nan a hinca Aruba aden

Mientras tanto nos por a wak den Parlamento cu algun colega ta demostrando mas seriedad y ta bin cu pregunta y cu critica alcaso. Sinembargo ta parce cu e fraccion di AVP simplemente no por stop di ta deceptivo, emocional y riba dje trocedo di berdad. Nan ta haci manera cu e pandemia y nan megadebe nunca a existi! Como parlamentario nobo mi ta keda asombra con desconecta e fraccion di AVP ta cu e realidad cu Aruba ta bibando aden. Nan ta asina desprendi di e realidad cu nan no sa of nan no kier compronde e pobresa, hamber y dolor cu nan lider y nan propio maneho 2008-2017 a causa Aruba.

E Megadebe: Aruba mester paga casi 90 miyon florin pa aña te cu 2049

AVP a hiba Aruba na rand di bancarota y a causa cu Hulanda mester a intermedia formalmente. For di 2014 Hulanda a manda CAft pa Aruba cual inmediatamente a exigi un reforma fiscal. Aruba a cuminsa paga e “megadebe di Mike Eman”, di casi 90 miyon florin pa aña cu el a pone riba lomba di nos generacion, nos yiunan y nietonan. Ningun hende hamas mag di lubida su famoso disertacion na Parlamento di Aruba den e tempo ey, den cual e la grita y declara cu e megadebe tey pa nos tur pag’e cu “orguyo!” Pueblo mester sa cu e megadebe desastroso den cual Mike Eman a hipoteca Aruba, tey pa nos pag’e te cu 2049. Sr. Mike Eman a duna pueblo klinker stoba, sopi asfalt y salada di brug pa come te cu 2049! Ki berguensa!