Cu bista riba futuro
AZV ta reuni cu ImSan

Diamars atardi AZV a reuni cu director di Instituto Medico San Nicolas (ImSan) dr. Joel Rajnherc na oficina di AZV na Camacuri.  E reunion a tuma lugar den bon ambiente y a intercambia punto di bista for di tur dos banda. Positivo ta cu ImSan mescos cu AZV ta habri pa traha hunto y  dr. Rajnherc a indica cu ImSan ta wak espacio pa rebaha gastonan.

Imsan ta pidi intermediacion di AZV pa yega na un bon cooperacion cu dr. Horacio Oduber Hospital. Esaki ta algo cu director di AZV Edwin Jacobs ta di acuerdo cu’ne. Pasobra al fin ta solamente hunto por yega na un solucion sostenibel.

Tambe tin un proposicion di ImSan pa yega na reduccion di e lista di espera pa cuido di wowo. Y un proposicion pa cuminsa cu tratamento di pijnbestrijding na ImSan. E dos proposicionnan aki ta wordo evalua door di AZV a base di eficacia y calidad. Mirando cu e recursonan financiero ta scars e ta mas importante cu nunca cu e revision a base di calidad di cuido y eficacia ta tuma lugar, pa asina por garantisa bon cuido awor y den futuro.