APROBACION DI PRESUPUESTO 2022 TA SUMAMENTE IMPORTANTE PA REALISACION DI PROYECTONAN DI MINSITERIO DI HUSTICIA Y ASUNTONAN SOCIAL
“Sr. Presidente, sin un presupuesto 2022 nos no lo por bay atende cu niun problematica cu miembronan di Parlamento a trece padilanti, entre otro e problematica, cu tur fraccion a trece padilanti, pa loke ta e lista di espera”
ORANJESTAD – Asina Minsiter di Husticia y Asuntonan Social Sr. Rocco Tjon a declara durante su discurso, diaranson siman pasa, den Parlamento di Aruba. Durante e reunion publico aki, a trata diferente puntonan di atencion y proyectonan cu ta importante pa e desaroyo di e cadena hudicial como tambe social. A trata entre otro, proyecto di ICT pa Cuerpo Policial, proyecto di ICT pa Departamento di Asuntonan Social (DAS) y tambe e lista di espera cu tin actualmente na GGZ/Respaldo.
E importancia di e proyecto di ICT pa Cuerpo Policial a wordo subraya y eleva durante e ultimo reunionnan e simannan aki door di Sindicato di Polis (SPA) y alto mando di polis, pa cual motibo a aloca fondonan den e presupuesto. Aprobacion di Parlamento di Aruba pa e proyecto aki ta sumamente importante pa e personal di Cuerpo Policial, pa asina percura tambe cu un miho servicio ta wordo brinda na henter nos comunidad. Den cuadro di esaki, reunionnan cu KPA a continua, anticipando riba aprobacion di presupuesto, pa ehecucion di e proyecto di ICT.
Pa loke ta trata DAS, esaki ta un departamento cu ta registra hopi informacion, sinembargo, e sistema cu nan tin actualmente ta anticua. Pa hopi tempo no a logra actualisa e sistema, pero clientela si a sigui aumenta. E sistema actual ta slow y tin menos capacidad di memoria cu a consecuencia cu e sistema sa cay y e servicio interno y externo ta stanca. Cu aprobacion di presupuesto lo adkiri un sistema nobo y moderno, tanto di hardware, computer y server, y esaki automaticamente lo mehora e trabou di e departamento en general (interno/externo) pero tambe lo mehora e servicio cu ta brinda na comunidad.
Por ultimo, un punto di preoupacion, pa tur stakeholders den e veld social, pero tambe pa Ministerio di Husticia y Asuntonan Social, ta e problematica di lista di espera. Ta asina cu na e momentonan aki no tin un sistema uniforma pa trata cu lista di espera, pa e motibo ey cada instancia cu ta maneha salud mental manera Respaldo, FMAA, SPD y HAVA, tin un lista di espera diferente, pues no tin un cifra concreto. Pa e motibo ey, e ta hopi importante pa dicidi ki maneho ta bay ehecuta pa asina por tin un miho bista riba esaki. Consecuentemente, a tuma e decision di forma un grupo, cu a base di consehonan huridico, lo bay comparti informacion entre e diferente departamentonan, y entrante prome di mei lo bay cuminsa cu e “werk/projectgroep” aki, consistiendo di cinco profesional riba e tematica di salud mental, pa atende specificamente cu e problematica di lista di espera. Bisando esaki, aprobacion di presupuesto 2022 ta crucial pa e proceso por tuma luga.
