Cambio di localidad di pago di bijstand

En conexion cu mantencion di MFA Noord

ORANJSTAD – Departamento di Asunto Social kier informa tur cliente di bijstand cu ta cobra na MFA Noord cu pa e siguiente lunanan lo bini un cambio den localidad.

Manera ta conoci MFA Noord ta den un fase di mantencion y ta cera pa publico. Esaki a conduci na un cambio di localidad pa loke ta trata pago di bijstand cuminsando e luna aki cual fecha di pago ta diasabra awo 9 di april 2022.

E localidad temporario ta bira oficina di Departamento di Asunto Social situa na Tanki Leendert. DAS su oficina na Tanki Leendert ta situa na Tanki Leendert 275-A y ta keda riba e caminda principal di Tanki  Leendert dilanti e scol Mi Pret’I Wowo.

Te ki luna e cambio aki ta keda na vigor DAS no por bisa pero si cu e ta uno temporario te ora cu MFA Noord habri bek pa publico. Pues un suplica ta bay na tur cliente di bijstand cu tur luna normalmente ta cobra bijstand na MFA Noord pa tene bon cuenta cu e cambio temporal aki pa asina evita cualkier inconveniencia.  

E cambio aki ta solamente pa clientenan cu ta cobra na MFA Noord, pago na nos otro localidadnan ta continua normal.

Pa mas informacion of cualkier pregunta tocante bijstand por tuma contacto cu Departamento di Asunto Social su seccion di bijstand na su telefon gratis 528-1110 of ‘like’ nos pagina di facebook “Departamento di Asunto Social” y keda bon informa tocante nos diferente servicionan.