REORGANISACION DI INMIGRACION ARUBA A DRENTA SU FASE FINAL

ORANJESTAD – Recientmente, durante e celebracion di 53 aña di aniversario di Inmigracion Aruba como un organisacion, Minister di Husticia y Asuntonan Social Sr. Rocco Tjon, a indica cu pronto e reorganisacion lo keda cla, mirando cu hunto cu DRH ta trahando riba esaki. Den e plan di maneho di Ministerio di Husticia y Asuntonan Social, a priorisa aspectonan cu ta regarda personal. Den cuadro di esaki, diahuebs mainta a notifica e tres sindicatonan esta, SEPPA-TOPA-STA, cu lo inicia cu e “plaatsingsprocedure”. Esaki, despues cu recientemente conseho di Minister a aproba e ultimo formato di e structura di organisacion, manera a ser palabra cu e sindicatonan.

Segun e mandatario, e structura di un organisacion ta lo mas importante. A base di esaki, e ta posibel pa, como organisacion, por cumpli cu tareanan, brinda e servicio cu comunidad ta exigi como tambe percura pa un carera digno pa e empleadonan. Inmigracion Aruba ta un organisacion cu tin un tarea importante pa loke ta eleva siguridad na nos frontera. Den cuadro di esaki nan ta forma parti di e “strategisch grensoverleg” como tambe e ehecucion di e “plan van aanpak versterking grensveiligheid”. Pa e ultimo plan aki, Hulanda a aloca cuater miyon euro.

Banda di e tareanan aki, ta hopi importante pa e aspectonan interno ta bon regla pa e trahadonan. Bisando esaki, DRH lo aserca e sindicatonan e siman nos dilanti pa duna splicacion tocante e procedura pa loke ta e “plaatsing”. Ta premira cu mas tarda den luna di juli e reorganisacion lo ta completamente finalisa. Asina por menciona, cu esaki lo ta e di dos reorganisacion cu ta keda cla durante gobernacion di Gabinete Wever-Croes II. E siguiente dos reorganisacionnan cu lo tuma luga ta di departamentonan di CEA y GNC.