Miembronan di Stellaris Casino a ricibi nan “Holiday Basket”
E casino mas grandi di Aruba a yama “danki”
ORANJESTAD, Aruba – 23 di december 2021: Esaki ta di dos aña consecutivo cu, debi na e pandemia y retonan di distanciamento social, cu Stellaris Casino di Aruba Marriott Resort ta organisa su evento di entrega di macutu na su fiel clientenan, den un evento estilo “drive-by”, dilanti porta di e casino. “Ta di e forma aki nos ta gradici nos tier playernan y yama nan danki y desea nan un cambio di aña yena di suerte”, asina Yazira Javois-Feliciana, Director of Marketing & Slot Performance na Aruba Marriott Resort & Stellaris Casino a duna di conoce durante e evento.
For di trempan caba tabatin un fila largo di auto wardando e momento pa nan por ricibi nan macutu yena cu regalo pa uza durante e dianan di fiesta. Tur fin di aña e casino ta parti “Holiday Baskets” como parti di e beneficionan di tur e hungadonan conoci como “tier members”. Na tur a parti riba 550 macutu entre tur e miembronan.
Yazira Javois-Feliciana a conta cu por ehempel e miembronan di e nivel “platinum” a bay cu dos macutu mas un caha di cerbes. Clientenan “silver” a bay cu un macutu, mientras cu esunnan di nivel “gold” a bay cu un macutu mas un caha di cerbes. “De facto, awe tur hende a haya un caha di Balashi regalo, sea nan a bay cu un of dos basket. Nos macutunan cada un ta balora na entre 200 pa 300 dollar”, segun e gerente di mercadeo a anuncia cu un orguyo riba su cara.
E empleadonan di Stellaris Casino a percura pa un bon ambiente durante e evento, aunke e tabata un “drive-by”. Asina mes Santa Claus tabata presente pa saluda y saca potret cu e hungadonan, a regala cada un di nan un T-shirt mas un cerbes Balashi bon friu.
Comosifuera poco, Stellaris Casino a entrega cada miembro un carta. Den e carta ta inclui un oferta di estadia na un tarifa super economico, desde awe 22 di december 2021 te cu 4 di januari 2022. Esun cu reserva y keda den hotel pa e fin di aña aki, lo por conta cu 100 dollar pa consumi na cuminda y bebida, tambe ta haya adicional 100 dollar “free play” den casino pa cada anochi cu nan keda den hotel. Mas anochi keda, mas “free play” lo tin disponibel pa hunga den Stellaris Casino.
Yazira Javois-Feliciana a termina yamando tur miembro di Stellaris Casino danki pa e sosten den henter aña 2021 y anunciando cu den 2022 nan lo tin mas sorpresa. A haci un apelacion riba henter comunidad pa cuida curpa, tene nos mes na reglanan stipula pa evita contagio y pa nos tur pasa un dushi cambio di aña.
Tocante Stellaris Casino Aruba Marriott Resort & Stellaris Casino a habri na aña 1995 y ta e casino mas grandi riba nos isla. E ta conta cu mas di 160 empleado, cu ta maneha 24 wega di mesa y mas di 400 slot machines. E weganan mas popular riba mesa ta Craps, Black Jack, Three Card Poker y Roulette, mientras cu e mashinnan mas uza ta esunnan di e sistema 3D y e “Mystery Progressive Jackpots”. Stellaris Casino tin bingo regularmente, cu 5 Progressivo inclui completamente gratis. Normalmente e casino ta habri 24 ora pa dia pa weganan di mashin mientras cu weganan di mesa ta cuminsa pa 2:00pm te cu 4:00am. Door di pandemia awo e ta keda habri te cu 2:00 am
