ISA LO TENE ACTIVIDAD PA CONSCIENTISA Y PROMOVE “DIA MUNDIAL DI CREATIVIDAD Y INNOVACION”

ORANJESTAD – Den cuadro di “Dia Mundial di Creatividad y Innovacion”, Gobierno di Aruba conhuntamente cu Futura, kier a comunica y trece atencion na un iniciativa creativo y innovativo cu lo bira realidad den e simannan venidero.

TRASHION FASHION SHOW

Gobierno di Aruba kier a informa comunidad tocante un evento innovativo y creativo organisa pa International School of Aruba. E evento aki, cu e nomber di ‘Trashion Fashion Show’, tin e meta pa conscientisa e comunidad riba e posibilidadnan pa recicla desperdicio den un manera creativo.

Ta trata akinan di un Fashion Show den cual e participantenan lo bay modela y demostra diferente trahenan creativo cu a wordo traha y construi uzando diferente obhetonan y artefactonan cu den prome instante por wordo mira manera sushi y desperdicio, pero cu en realidad por wordo recicla pa traha obranan unico.

E evento lo tuma lugar riba diabierna 29 di april, cuminsando di 5:00 PM te cu 7:00 PM na Internacional School of Aruba. Participacion ta posibel pa hobennan di 6-14 aña di edad cu registra atraves di e pagina: isatrashionfashion.com. Pa publico en general, entrada ta costa 2 florin pa persona, y tur e fondonan cu ta wordo collecta lo bay pa Plastic Beach Party pa contribui na e esfuersonan di conscientisacion riba e tema di desperdicio y reciclahe, especialmente na Aruba. Pa mas informacion tocante e iniciativa di Plastic Beach Party, bishita www.plasticbeachparty.com

Un yamado especial ta bay na hobennan, y comunidad en general pa participa y/of atende e evento aki pa un causa sumamemente importante. Finalmente nos kier a gradici y alaves aplaudi International School of Aruba, y tambe Plastic Beach Party pa e iniciativa aki.