AHATA TA GRADICI “BAN LANTA Y PLANTA” RIBA DIA DI PLANETA TERA

ORANJESTAD, Aruba – 22 April 2022, Riba Dia di Planeta Tera, Aruba Hotel & Tourism Association a entrega un donacion na “Ban Lanta y Planta”. Cu e gesto financiero, AHATA ta gradici e voluntarionan dedica na planta mata indigeno na diferente localidad na Aruba.

CEO di AHATA, Tisa LaSorte, a hasi entrega di un donacion na Presidente di Ban Lanta y Planta, Sra. Anita Aerts y miembro di e committee, Sr. Roy Maduro, pa apoya nan proyectonan y yuda enfatisa e necesidad di planta y cuida mata.

Mata ta crea oxigeno, ta duna nos sombra, y ta embeyece nos isla. Ora un hende planta mata e ta yuda mitiga e daño cu e persona mes ta causa na nos medio ambiente pa medio di consumo diario. AHATA ta spera cu Aruba progresa den esfuersonan pa proteha nos medio ambiente y cu un y tur ta planta y cuida mata.