Den e prome kwartaal di 2022 a recupera 77% di e total di pasahero cu a biaha for di Aruba
ORANJESTAD, Aruba
Aruba Airport Authority N.V. (AAA) ta raporta riba Aeropuerto Internacional Reina Beatrix (AUA Airport) su prestacion pa cu e prome kwartaal di 2022; mescos cu 2021, e tawata un comienso trankilo, sin embargo cu un indice di recuperacion satisfactorio compara cu e mesun periodo den 2019. E suma total di entrada genera na pasahero durante e prome kwartaal di 2022 durante Januari, Februari y Maart a representa un recuperacion total di 77% compara cu 2019.
Prome kwartaal di 2022 pa luna
Den Januari 2022, AUA Airport a atende 76,741 pasaheronan cu a biaha for di Aruba. Esaki tawata 16% menos cu December 2021 y tawata un resultado directo di e variante Omicron cu a gara e mundo na e momento ey. E mesun efecto tawata remarkable durante Februari na unda tambe AUA Airport a atende 77,599 pasahero cu tawata mas o menos 1% mas cu e luna prome. Na Maart mientrastanto e cifranan a subi considerablemente cu 104,462 cu tawata un aumento di 35% compara cu Februari 2022. Durante e tres prome lunanan di 2022, 199,092 pasahero a biaha pa Estados Unidos, 7,141 pa Canada, 21,375 pa Europa, 8,852 pa Antillas Hulandes y 22,342 pa Latino America.
Un averahe di Passenger Load Factor (PLF) na salida (cantidad di asiento ocupa di e cantidad total di asiento disponibel abordo di un avion ora di sali for di Aruba) pa e mercado mericano di 57%, 69% y 86% a wordo raporta pa Januari, Februari y Maart respectivamente. E promedio di PLF pa tur mercado tawata 61%, 71% y 85% respectivamente durante e mesun periodo. Na Maart nos a logra e mesun nivel di e promedio di PLF pa tur mercado cu 2019, cu tawata 85%.
Durante e lunanan anterior, AUA Airport tawata tin un averahe di 31 buelo pa dia, compara cu un averahe di 41 buelo pa dia den mesun period di 2019.
Na Januari, Februari y Maart, AUA Airport a recupera 66%, 79% y 86% respectivamente di e total di pasahero saliente compara cu e mesun lunanan den 2019.
E recuperacion total pa cu e prome kwartaal di 2022 a subi cu 77% compara cu 2019, cual ta un aumento di 39% puntonan procentual ora di compara cu e recuperacion disfruta na 2021 pa e mesun periodo.
