Protesta o Manipulashon Polítiko?

KRALENDIJK, Bonaire

Debí na vários pregunta, deklarashon i aserkamentu ku si NKBB i BHRO lo partisipá na e manifestashon ku ta planiá pa luna di mei benidero i hasta ku Sr. Nochi Willem, un polítiko di antaño a indiká públikamente ku a invitá James Finies – NKBB pa partisipá, nos ta informá lo siguiente.

Pa medio di esaki NKBB i BHRO publikamente ta distansiá nan mes di e deklarashonnan di Nochi Willem akí i ta enfatisá ku NKBB lo no partisipá den e manifestashon akí pa varios motibu.

Na promé lugá manifestashon ta un arma mashá poderoso kaminda prinisipalmente suidadanonan ta tuma inisiativa i protestá públikamente pa purba fòrsa un kambio. Den kaso di Boneiru, loke nos a nota durante añanan, ta ku lidernan polítiko a mal uzá e arma akí di suidadanonan, esta manifestashon, pa mobilisá suidadanonan anto ora manifestá na final ta entregá un manifesto i ta uza esaki pa sea moveshon polítiko pa elekshon anto nunka ta realisá nada, aña’den aña’fo. Ken no ta kòrda e último manifestashon grandi di penshon, kaminda ku masalmente Boneiru a uni i a para i paralisá e isla, inkluyendo polis, dosentenan, empleadonan públiko, trahadónan di airport èts. Na último momentu, na lugar di eksponé Hulanda na komunidat internashonal, ta parse ku lidernan sindikal enkabesá pa Nochi Willem ta laga e manifestantenan kai i ta hasi un deal polítiko ku e polítikonan anto te ku awe e motibu i meta di e manifestashon no a keda konkretisá. Den kaso di Boneiru, desde 10-10-10, e aneksashon ilegal, polítika, gobièrnu i demokrasia, ta un farse, ya komo ku ta Hulanda ta disidí. Den kaso di demokrasia real, polítika, gobièrnu i demokrasia, ta esun ku bo vota p’e i ku gana, ta disidí i goberná ku e sèn di impuesto ku bo ta paga komo un deber síviko. Na Boneiru, islanan BES, ku ta kolonia den bachi di Entidat Públiko, demokrasia ta un engaño di e humilde pueblo nativo.

NKBB a skohe pa stòp ku mas i mas divishon di e pueblo boneriano i lo no koperá pa sigui yuda ku manipulashon i koperá ku polítikonan ku no ke konfrontá e realidat akí, pero NKBB a skohe pa e solushon via di Nashonnan Uní (NU). NKBB I BHRO ta kanando e trayekto pa bai riba e Lista di Teritorionan-Sin-Propio-Gobernashon di Nashonnan Uní, kaminda ku lo invoká artíkulo 73 di Nashonnan Uni i Hulanda tin ku raportá anualmente na Asamblea General di NU kon e ta kumpli i yuda e pueblo boneriano ku su desaroyo ekonómiko, sosial, kultural, polítiko i edukativo. Ta straño ku algun aña kaba ku NKBB ta su so luchando pa e meta di bai riba lista i solamente ta bin haña kontratiempo i sero koperashon di lidernan polítiko lokal.

Awor NKBB a dal un siguiente stap den direkshon di kominudat internashonal, pa traha pa konkretisá esaki i ta den eksterior pa tempu indefiní, luchando pa derechonan di e pueblo boneriano i ku nos ta mas serka ku nunka pa realisa esaki, awor kier purba hinka NKBB bèk den polítika di dividí e pueblo, ku manifestashon pa gana sosten popular pa elekshon benidero… Pa polítikonan esaki ta un reto kasi imposibel pasobra polítiko tin un meta ku ta haña voto. Den kaso di Boneiru, e Hulandesnan ku a invadí Boneiru despues di 10-10-10 i ku ta sigui drenta Boneiru tambe por vota anto nan voto tambe ta konta. Ku tempu e boneriano ya a bira un minoria anto e voto boneirano tambe lo bira un minoria. E polítiko sa esaki i tambe ku e no tin niun poder pasobra ta Den Haag ta sigui disidí. Solamente ora ku nos ta riba lista di Nashonnan Uní, votamentu, partido polítiko i gobernashon lokal lo tin sentido, ya ku nos lo tin backup di komunidat internashonal, di Nashonnan Uní i tur su institushonnan pa yuda e pueblo boneriano, polítiko i gobièrnu lokal, ku e relashon ku Hulanda.

NKBB ta determiná den su lucha. Asta ora ku polítikonan boneriano keda sin uni ku NKBB riba e ruta pa subi lista di Nashonnan Uní i yuda huntu splika i konsientisá e pueblo, ku no tin otro alternativa òf solushon pa Boneiru, sino e lista di Teritorionan-Sin-Propio-Gobernashon di Nashonnan Uní, meskos ku Islanan Virgines US i Britániko, Islanan Kayman, Anguilla i Bermuda, NKBB lo no stòp. NKBB I BHRO lo keda nan so, si ta nesesario, lucha asta kontra nos mes lidernan polítiko i otronan lokal, ku ke stroba, pa realisá un solo meta ku ta: restorá derechonan humano i outodeterminashon di e pueblo boneriano.