Minister Geoffrey Wever a reuni cu Kiwanis Club of San Nicolas en conexion cu Young Entrepreneur Summit dia 19 di mei 2022
ORANJESTAD, Aruba
Den un encuentro na Bureau di Minister Wever, a cera conoci oficialmente cu e club di servicio Kiwanis Club of San Nicolas, den cuadro di preparacion pa e Young Entrepreneur Summit (YES), cu lo tuma luga na San Nicolas dia 19 di mei proximo.
Minister Wever, a trece diferente punto dilanti encuanto e desaroyo di San Nicolas, cu atencion special riba e hobennan โpariba di brugโ. Minister Wever a splica cu e ta mira e desaroyo sostenibel di San Nicolas, mara na desaroyo di e hobennan y specialmente nan e abilidad necesario pa hasi negoshi exitosamente.
“Tin un poder economico enorme pariba di brug mirando e grupo grandi di ciudadanonan cu ta biba pariba. Sinembargo, e no ta refleha den e actividadnan economico y comercial den e centro di ciudad di San Nicolas,โ Minister Wever a comenta.
Miembronan di Kiwanis Club of San Nicolas a trece nan preocupacionnan dilanti y tambe nan ideanan pa yuda crea un centro di ciudad vibrante atrobe na San Nicolas. E enfoke ta pa duna mas educacion y sosten na e hobennan pariba di brug cu cursonan y workshop nan educativo cu directamente lo contribui na mas movecion den e centro di ciudad. Ademas, a vocifera cu incentivonan fiscal y flexibilidad di permiso pa establece negoshi, ta obstaculonan cu mester traha ariba dje pa duna empuho na desaroyo di San Nicolas. Minister Wever, a informa miembronan di Kiwanis Club of San Nicolas, cu e tin atencion pa e obstaculonan aki y pronto lo ta presentando maneho nan concreto pa adresa esaki nan.
Finalmente, Minister Wever a hasi peticion na miembronan di Kiwanis Club of San Nicolas, pa sostene e Young Entrepreneur Summit dia 19 di mei y yuda hiba e mensahe pariba di brug cu tin atencion pa San Nicolas y pa por logra cosnan concreto pa pariba di brug mester e sosten activo di ciudadanonan di San Nicolas.
Minister Wever, a gradici Presidente Sra. Endrah Richardson Gumbs, Vice- Presidente Joanette Vrutaal, Director of Youth & Children Giandra de Cuba, and Director of Programs Gregory Richardson pa nan sosten activo na e evento di YES! San Nicolas. Minister a finalisa bisando di ta disponibel pa sostene nan organisacion den nan metanan como club di servicio pa e hobennan di San Nicolas.
Young Entrepreneur Summit San Nicolas lo tuma luga dia 19 di mei proximo, di 6pm pa 9pm na Principal Movie Theater na San Nicolas. ย Pa mas informacion por bishita e Facebook page YES San Nicolas. Tene na cuenta cu pa por participa mester registra. Registracion y participacion ta completamente Gratis!
