Pa prome biaha den historia Aruba ta ricibi un Mega Crusero den nos waf
Bon Bini Allure of the Seas!
ORANJESTAD, Aruba
Diaranson ta un dia historico pa Aruba su turismo crusero segun Minister di Turismo Sr. Dangui Oduber. E ta yena bo di satisfaccion pa por mira con Aruba Ports Authority ta yama Allure of the Seas bon bini na Aruba. Allure of the Seas di e compania Royal Caribbean Cruise Lines ta un di e barco crusero mas grandi di mundo. Nan a ricibi un bon bini den nos porta crusero cu e saludo di awa tradicional pa e tugboat nan. Minister Oduber a menciona cu a haci hopi preparacion pa por ricibi un mega crusero na Aruba.
Allure of the Seas a yega Aruba cu un total di 4505 pasahero abordo. Locual ta hopi positivo pa Aruba ta cu den henter e ruta di e barco crusero, e porta di Oranjestad ta esun caminda mas ora (15 ora) e lo keda staciona. Esaki ta nifica cu e pasaheronan aki lo tin mas ora pa nan aporta na aruba su economia.
E barco aki por acapara 5.400 pasahero, tin un total di 18 piso y ta midi 362.12 meter di largo. Tambe Allure of the Seas ta nabega uzando 30 porciento di gas LNG cu ta hacie mas amical pa nos medio ambiente.
E preparacionnan pa por ricibi un mega crusero den nos waf ya caba a cuminsa for di basta tempo. For di aña 2018 caba Gobierno di Aruba a haci un inversion di 14 miyon florin pa asina nos por a haya e tugboat Colorado pa esaki por tabata posibel. Tambe 3 luna atras Aruba Port Authority a inverti 1.6 miyon florin pa cuminsa trabaonan pa coba y hasi limpi (draga) 100 meter bao di laman na waf, pa asina logra haya e profundidad di entre 12 pa 13 meter bek. Awe nos ta mira e frutonan di nos inversionnan cu yegada di e barco mas grandi cu a yega di staciona den nos wafnan. Tur esaki nan ta preparacionnan cu a wordo haci pa por a ricibi e prome mega crucero aki, asina Minister Oduber a trece dilanti.
Minister Dangui Oduber ta kere firme den e recuperacion di Aruba su turismo y economia, pesey Gobierno ta haciendo tur lo necesario pa sigui stimula nos economia. Un palabra di gratitud ta bai pa e director sr. Marc Figaroa, henter e gerencia di APA N.V. y tambe e hunta di comisario.
