Parlamentario Shailiny Tromp-Lee (MEP): ‘Door di uni y pone Aruba na prome lugar nos por construi un mañan mas briyante’

Aki 1 dia, nos tur lo ta contando e minuutnan pa mei anochi yega pa yama un otro aña nobo bon bini. Sigur un bon momento pa nos reflexiona riba esun cu ta cabando.

E aña aki, mescos cu 2020, tabata un berdadero desafio pa hopi di nos. Nos a sigui experiencia e pandemia mundial cu a sigui menasa nos salud, nos economia, nos forma di biba y nos libertad. Nos a sigui experiencia podernan cu kier dividi nos pueblo y crea odio, descordia y enemistad sin sentido sin tene cuenta cu e efecto devastador cu esaki tin riba e recuperacion di nos pais y e trankilidad cu ta asina necesario pa nos por reconstrui nos pais. Na mes momento mester enfatisa cu no ta tur cos tabata negativo pasobra nos a sigui experiencia bondad, solidarismo y comprension.

Apesar di e peso di e pandemia riba nos salud mental y fisico y e situacion financiero di e ultimo 12 lunanan, nos por a mira cu nos pueblo a sigui mustra forsa, resistencia y boluntad pa traha hunto. Gobierno y comunidad a sigui apoya esnan mas vulnerabel, famianan a sostene otro y comerciantenan a haci mas posibel pa mantene nan trahadornan na pia di trabou. Hunto a traha y lucha pa un mihor futuro y mas husto pa un y tur. Esakinan ta e accionnan cu mester sigui inspira nos drentando e aña nobo nos dilanti.

Den 2022, como pais, nos lo mester sigui lucha contra COVID-19, pero awor cu perspectivanan mas positivo y mirando e pronosticonan sigur cu un sentido di speransa grandi. Nos ta pasando den e di 5 ola di e pandemia pero casi 70% di nos hendenan ta vacuna y nos a cuminsa administra e booster shot pa aumenta e grado di efectividad y proteccion di e vacuna. E sosten financiero y subsidio di salario a yega na nan final pero nos economia ta conociendo un crecemento positivo cu ta of lo mester crea e cuponan di trabou cu ta asina importante.

E pandemia a siña nos hopi cos. E retonan cu nos a sigui enfrenta e aña aki sigur a demostra e importancia pa nos reconstrui nos pais lo mihor posibel y traha riba e recuperacion cu ta asina anhela. aMientras nos ta recupera di e crisis aki, nos mester probecha di tur oportunidad pa haci nos pais mas fuerte, mas sostenibel y mas husto pa un y tur. Esey significa construi un economia mas inclusivo y resiliente, uni forsa y traha hunto.

Bisando 2021 ayo y yamando e aña nobo bon bini, laga nos reflexiona riba tur loke nos a siña riba tur tereno, riba nos perseverancia, nos empatia y compasion pa otro. Tambe laga nos gradici pa tur nos bendicionnan pasobra nos tin hopi. E pandemia a mustra nos cu nos por logra y supera tur cos ora nos ta traha hunto y dirigi pa logra metanan comun. Awe mientras nos ta den e di 5 ola, ban enfoca riba surpasa esaki pero no ban perde di bista tur e oportunidadnan cu ta spera nos den 2022. Laga nos sigui construi un Aruba mas fuerte, resiliente y mas husto. Un Aruba dushi pa biba y bishita.

Laga nos cuminsa aña 2022 cu un promesa renoba caminda nos ta compromete nos mes na e norma y balornan manera respet, solidaridad, cordialidad y compasion cu ta defini nos como un bon Arubiano. Door di uni y pone Aruba na prome lugar nos por construi un mañan mas briyante pa nos tur.

Mi ta termina deseando un y tur un feliz cambio di aña den union familiar. Cu Papa Dios bendiciona cada un di nos. Bon aña!