WEB ta contento di anuncia cu construccion di planta RECIP IV ta yegando su final!

ORANJESTAD, Aruba

E siman aki WEB ta drenta un periodo di test di diferente parti di e sistema, pa confirma cu e planta nobo ta funciona debidamente. E testnan ta planea pa tuma lugar entre 10 pa 31 di mei 2022. E grupo di proyecto RECIP IV, hunto cu empleadonan di diferente departamento na WEB en cooperacion cu partner Wärtsilä, ta determina pa e testnan tuma lugar na un manera mas safe y responsabel posibel. Aunke no ta spera, mirando e magnitud y riesgonan envolvi cu e trabou, ta keda existi un posibilidad MINIMO cu por surgi interupcion di coriente. Lo tuma tur precaucion y coordina e trabou di tal forma pa evita cualkier incidente of interupcion di coriente. WEB ta spera di por conta cu comprension di comunidad y di antemano ta ofrece disculpa pa posibel inconveniencia. Ta recomenda pa sigui WEB su updates durante e periodo di testmento. Cu planta RECIP IV riba liña, WEB por desmantela e antiguo unidadnan di vapor den futuro cercano, reduci e consumo di HFO (20-25%), reduci emision di CO2 y percura pa un suministro mas confiabel.