Lansamento Oficial di Proyecto Nacional:

Encuentro Multicultural Aruba 2022 y 2023.

ORANJESTAD, Aruba

Riba dia 21 di mei 2021 di aña pasa a tene pa prome biaha e tradicional Encuentro Multicultural Aruba cu den pasado ya caba tabata ser celebra pa 15 aña consecutivo bou di e nomber di ‘Feria Multicultural’ cu tabata ser realisa riba dia 12 di October cu ta ‘Dia de la Raza’ cu ta un dia pa conmemora. Motibo pa e cual a busca un fecha mas special pa haci e celebracion aki pa cuminsa cu su Prome Edicion di e ‘Encuentro Multicultural Aruba’ relaciona cu Celebracion di: “Dia di Diversidad Cultural pa Dialogo y Desaroyo” na unda e gruponan participante por a presenta sin publico general, mirando cu nos tabata den tempo di Pandemia.

Esaki a trece cu e aña aki nos ta organisando e actividad un biaha mas pa publico general, riba diasabra 21 di mei 2022 na Cas di Cultura Aruba, cuminsando pa 06:30 te cu 09:30 pm, na unda entrada ta completamente gratis.

Nos como Departamento di Cultura Aruba (DCA), ta gradici tur grupo cu a logra presenta di un forma espectacular na esun di aña pasa (2021). Esta Aruba, Grupo Multicultural Aruba, Antonieta C. Ras Booi, Sergio Tje. A. Loi. Hubert Fernando Ras, Argentina, Tango Barefoot, Bonaire, Poeta Muñe Winklaar-Oduber, Brazil, Capoeira Nova Visao Aruba, Colombia, Consulado Colombiano na Aruba, Cuba, Grupo RCC Aruba, Curacao, Poeta Poppy Caciano, Republica Dominicana, Fundacion Grupo Folklore Dominicano Aruba, España, El Duque Victor Samuel, Angela Croes, Haiti, Grupo AFROKREMA, India, Dancing- With-Magz, India Cultural Dance, Mexico, Mariachi Luz di Luna, Portugal, Grupo Folklorico Primavera, Peru Fiestas Patrias, Peruanos en Aruba y Grupo di Baile Folklorico Takiri Peru-Aruba, Philippines, Consulado y Grupo Paraluman, Suriname, Grupo Cultura Bibo y Venezuela, ‘Grupo Expresión Folklorica Viva Venezuela’ y Comunidad Wayu. Colombo Venezolana y e Clausura na encargo di Grupo Popcorn Dancers Aruba.

Nos ta agradici tur grupo aki pa nan valioso aporte y participacion. Nos ta invita nan tur bek p’asina aki por mustra na un publico en general e trabaonan artistico cu sigur a resalta grandemente trahando den conhunto pa fomenta e integracion y aporta na e paz y unidad di tur e pueblonan di nos tera.

Departamento di Cultura Aruba (DCA) ta invita na tur pais y gruponan Folklore Cultural organisa, incluyendo Aruba, tur esnan interesa di participa y comparti cu otro tur nan obranan, reflexion, pensamento y/of cualkier acto artistico ya sea den forma di baile, teatro, poesia, musica, canto, video, etc pa acerca na Departamento di Cultura Aruba y sigura boso participacion den e tremendo actividad multicultural aki.

E invitacion ta dirigi na tur Consulado, grupo, artista, promotornan cultural, etc cu ta desea di forma parti di e edicion 2022 por busca e formulario di inscripcion y entrega esaki na DCA mas tarda te cu dialuna 16 di mei 2022, pa forma parti. Ya sea cu’n presentacion existente y of nobo, p’asina aki nos por tin un programa mas amplio pa comparti cu nos comunidad.

E inscricion pa e edicion number 3 pa aña 2023 desde awo ta keda oficialmente habri y ta cera diaranson 12 di october 2022, na unda nos lo tene un Acto Simbolico pa Conmemora ‘Dia di la Raza’ y tambe p’asina aki nos por tin un bista mas amplio di tur grupo participante. Y di e manera ey cuminsa cu e preparacion pa celebra e proyecto aki na grandi cu lo ser programa den un actividad di un siman largo na unda nos lo trece bek e ‘Exposicion Gastronomico’, e ‘Artesanal’, ‘Intercambio Artistico y Multi-Disciplinario Aruba’ y show Multicultural na aña 2023.

E proyecto y programa aki cu Departamento di Cultura Aruba ta presenta den e ‘Proyecto Encuentro Multicultural Aruba, ta basa su mes riba un di e frasenan mas sabio di, Sr. Hubert O. “Lio” Booi d.f.m., cu ta bisa:

“Pone e Arubiano na haltura di su cultura y siñ’e conoce di otro”.

Durante e actividad aki, diferente organisacion, persona y grupo di tur nacionalidad ta haya e oportunidad pa:

– Crea un luga di encuentro y intercambio cultural, entre e habitantenan di Aruba, esta hende di tur nacionalidad y rasa, p’asina nos tur por conoce mas di cerca e cultura y custumber di otro;

– Crea un ambiente di convivencia pacifico, caminda respet, tolerancia y libertad di expresion artistico y cultural ta resalta, pa despues sigui divulga y promove esaki;

– Presenta den combinacion cu un show di un intercambio multi-disciplinario cultural un tema di reflexion, un exposicion gastronomico y artesanal;

– Crea un espacio caminda artista di tur genero, por demostra nan talento y expresa na e publico presente, tur e potencial artistico cu ta rondona nos riba un solo isla, nos perla den lama Caribe;

– Cera conoci cu otro pa medio di literatura, arte, pensamento, filosofia, idioma, religion y folklore popular;

– Destaca e aspectonan mas positivo di cada persona y pais cu ta basa riba e balor, respet y atencion cu ta ser duna na nos simbolo, idioma y identidad, cu ta haci nos unico, grandi, diferente y special;

– Uni cu otro pa por fortifica tur laso di amistad entre e Arubiano y paisanonan di otro nacionalidad cu ta biba na Aruba;

– Stimula pueblo di Aruba pa por sigui traha, biba, sinti y conserva e herencia cultural, material y inmaterial, proteha nos patrimonio y legado cultural di cada nacionalidad y asina aki por tin espacio pa comparti e rikesa cultural di tur hende cu ta biba na Aruba den completo harmonia y paz cu otro;

– Engrandece e respet pa siña diferencia y balora e forma di biba y tur e otro expresionnan, tradicion, cultura y folkore di otro pueblonan;

– Uni nos mes na e iniciativa di UNESCO pa celebra y crea un dia di dialogo y di desaroyo p’asina aki nos por siña di otro y yega na diferente acuerdo di cooperacion y sosten mutuo pa sigui traha den ekipo pa engrandece nos Aruba;

– Yuda fomenta union y e deseo di por sigui traha, expresa, comparti y biba cu otro den completa harmonia, paz y trankilidad;

– Laga tur otro pais, por cera conoci cu nos cultura Arubano y permiti pa otro colonia por mira y midi nos diferencianan y compronde tur e similaridad cu nos cultura tin pa ofrece y cu por yuda cu e comprension di e reis di nos existencia, esencia, origen y principio cu cada pais ta draai rond di dje cu ta haci nan unico, diferente y special;

– Crea un plataforma na unda anualmente por bin cu diferente topico di discusion, pa por sigui intercambia, integra y comparti tur loke nos tin pa expresa;

– Enrikece nos conocemento, respeta nos creencianan, comparti nos norma y balornan y resalta tur nos identidad.

– Fomenta igualdad, participacion, respet, union, amor y tolerancia.

Pa mas informacion por tuma contacto libremente na Departamento di Cultura Aruba y/of via Facebook di ‘Departamento di Cultura Aruba’ y esun di Jhon Freddy Tobón Montoya mes, kende ta e  Lider di Proyecto, su e-mail adres teatroaruba@hotmail.com y/of yama libremente via su cel.: 565-69-03.