PROME MINISTER TA FELICITA ARA CU 35 AÑA COMO NOS COLEGIO HALTO DI ESTADO

ORANJESTAD, Aruba

Bo no por papia di democracia si bo no tin un Controlaria General den bo pais”

Diahuebs mainta, durante Conferencia di Prensa di Gobierno di Aruba, Prome Minister Evelyn Wever-Croes a felicita Controlaria General, Algemene Rekenkamer (ARA), cu ta celebra 35 aña. ARA ta e un pilar fundamental di e democracia di nos pais. Bo no por papia di democracia si bo no tin un Controlaria General den bo pais. Un pilar sumamente importante.

FUNCION DI ARA:

ARA ta nos colegio halto di estado cu ta encarga cu e trabou importante di asisti Parlamento den nan tareanan di controla Gobierno. Den e cuadro aki ta hopi importante pa ARA ta consisti constantemente structuralmente di personanan cualifica, prepara pa por haci investigacionnan necesario sea ora cu e wordo pidi of di propio iniciativa pa asina por duna un opinion riba entre otro e cuentanan anual di Gobierno, proyectonan y otro tipo di desaroyonan.

META DI GABINETE WEVER-CROES:

Un di e metanan di nos Gabinete ta pa fortifica e pilar aki, fortifica e instituto halto di estado aki mas tanto posibel pa asina nos fortifica tambe nos sistema, nos orden democratico cu nos tin den nos pais. Pa esaki nos a institui un comision “Versterking Democratisch Bestel” cu ta yudando Gobierno riba e fortificacion aki riba diferente pilar. Cuminsa riba e Ombudsman, a traha riba Raad van Advies cu pronto lo wordo trata den Parlamento, ta sigui cu Parlamento mes y cu ARA. E meta ta pa independisa e institutonan aki mas tanto cu ta posibel, fortificando nan pa asina nan por haci e trabou importante di check and balances cu pueblo di Aruba ta conta riba dje.

MIEMBRONAN NOBO DI ARA:

Algemene Rekenkamer ta consisti di miembronan nobo cu apenas a huramenta un luna pasa. Señora Xiomara Croes tin un estudio den business finance y e tin 30 aña di experiencia riba e tereno financiero tanto den sector publico y sector priva a traves di su compania chikito cu e tawata tin. Recientemente señora Xiomara Croes-Williams a wordo proponi door di Parlamento pa lidera, bira presidente di e colegio aki.

Señor Christopher Lake tin un estudio di Business Economics y ta dirigi un compania grandi na Aruba y hopi di nos conoce tambe como hooffcomissaris di scouting Aruba.

Señor Rick Samuels, un abogado conoci aki na Aruba, ya caba desde 2017 ta miembro di ARA.

“E tres personanan aki ta forma e colegio di ARA cu awor ta completo. Nos tin tambe secretaris di ARA, señora Mary Ann de Jong-Curet cu ta e motor tras di tur loke ARA por logra hunto cu e ekipo di personal hopi dedica y cualifica cu ta traha na ARA. Mi kier yama e miembronan pabien y bon bini. Pabien ARA cu celebracion di 35 aña. Hunto cu e secretaris mi ta sigur cu lo logra tur meta.”, Prome Minister a termina bisando.