ARA LO ASUMI PRESIDENCIA DI CAROSAI PA UN PERIODO DI TRES AÑA

ORANJESTAD, Aruba

Durante conferencia di Prensa di Gobierno di Aruba diahuebs mainta, Prome Minister Evelyn Wever-Croes hunto cu miembronan di Controlaria General, Algemene Rekenkamer (ARA), a anuncia cu entre 15 pa 19 di mei 2022, Aruba lo ta anfitrion di e XII Congreso di CAROSAI na unda cu diferente orador internacional lo ta presente pa elabora riba e tema central di e congreso, “Targeting Superior Audit Impact”. Prome Mininster tambe lo ta un orador invita den e congreso.

Señora Xiomara Croes, presidente di ARA a elabora mas riba e parti di e congreso y riba CAROSAI. Actualmente, Algemene Rekenkamer Aruba tin e posicion di vice-presidente. Entrante otro siman, durante e congreso, Algemene Rekenkamer Aruba lo asumi presidencia CAROSAI pa un periodo di tres aña. CAROSAI, ta e organisacion di Controlaria Generalnan di Caribe y ta cay bou di e organisacion international di Supreme Audit Institutions –INTOSAI-. Miembrecia di CAROSAI ta habri pa tur organo halto di control den region Caribe y ta conta cu miembrecia di 23 pais/isla.

“Mi ta contento y orguyoso cu Aruba ta bay haya e presidencia di CAROSAI, cu ta pa Aruba un honor grandi. ARA a logra esaki cu hopi trabou duro, dedicacion y determinacion, pero especialmente e bon nomber cu ARA tin y ta proyecta tambe den exterior. Solamente nos mester percura pa e algemene rekenkamer di Aruba keda funciona manera nos conoce, riba e nivel cu nos conoce, pero tambe aworaki cu e responsabilidadnan internacional di region di Caribe cu ta trece mas trabou”, Prome Minister a expresa.

Den nomber di Gobierno di Aruba y pueblo di Aruba en general, Prome Minsiter ta felicita ARA pa nan 35 aña y pa e funccion di presidencia di CAROSAI.