Dia internacional di famia ta dia pa reflexiona riba importancia di pasa tempo hunto

ORANJESTAD, Aruba

Desde aña 1994 mundo ta celebra Dia Internacional di Famia riba 15 di mei. Aki nos ta para keto pa duna e importancia cu e famia tin den nos sociedad, como fundeshi of e pilar. P’esey ta importante pa ta conciente riba e importancia di e sistema familiar pa cada ser humano lanta cu un desaroyo saludabel y funciona bon den nos comunidad.

Na Aruba y mundialmente nos por mira cu e pandemia cu a pasa a haci un impacto grandi ariba e sistema familiar. Nos por a nota 2 banda di medaya. Stress laboral, stress emocional y stress parental tawatin su impacto y nos ta experenciando e efectonan. Di otro banda por a nota cu e pandemia tambe a trece e famia mas cerca di otro. A comparti mas momento hunto, pa consola otro, sostene otro y asina experencia con balioso e ta pa por tin un circulo familiar.

Laga nos tuma e dia di famia aki como un dia pa comparti y reflexiona hunto riba con importante bo famia ta pa bo bida y con importante pa brinda otro amor y sigur tey pa otro den cualkier circunstancia.

Mi kier invita pueblo di Aruba pa asisti dia 15 di mei 2022 di 10:00 am – 3:00 pm na e actividad na Centro di Bario Playa Pabou organisa pa Centro pa Hoben y Famia hunto cu 15 instancia. Lo duna informacion di nan servicionan y alabes lo tin diferente actividad pa ful famia.

Ban keda corda semper cu famianan fuerte automaticamente ta traduci na un Aruba fuerte!