Tropical Bottling Co. a reconoce 205 aña di servicio den e ultimo kwartaal

ORANJESTAD, Aruba – 15 di mei 2022: Tropical Bottling Co. a bini hunto pa reconoce empleadonan cu ta traha cu nan pa mas di binti aña. A reconoce 205 aña di servicio pa hiba e compania padilanti.

Luis Koolman, distribution manager, a conta cu pa motibo di restriccion di Covid-19, a pone cu no por a organisa un celebracion pa cada un. A celebra cu no menos di ocho empleado den e ultimo kwartaal. Awor cu pocopoco nos ta saliendo for di e pandemia, a opta pa no lubida riba e celebracionnan aki.

Entre e ocho coleganan aki tin cu a cumpli hasta binti aña di servicio, manera Albert Vrolijk di Produccion, Joel Growell di Warehouse, Marica Kock di Accouting y Lizbeth Roberts di HR Department. Empleado cu tin binticinco aña trahando cu e compania ta Jairo Oñate den garashi. Por lo menos dos empleado tin trinta aña caba cu e compania, esta Bianca Wester di Accounting y Fabian Gutierrez di Refrigeration. Y no por a keda afo e empleado cu a cumpli cuarenta aña di servicio, Emiliano Tromp di Syrup Room

Gerente general di Tropical Bottling Company, Warren Stanley a habri e evento cu un bunita introduccion. Den su discurso el a yama cada un di e empleadonan danki pa nan lealtad y compromiso cu e compania. Eddie de Veer, CEO di MetaCorp, a tira un discurso pa tur empleado pero specialmente pa Emiliano Tromp cu a cumpli no menos di cuarenta aña di servicio cu nan.

Tropical Bottling Co. a gradici famia di cada empleado reconoci y sin lubida e pensionadonan cu tambe tabata presente. A sinti nan falta masha e ultimo tempo, pasobra door di restriccion, no a logra organisa ningun evento pa por a invita esunnan cu ya a traha pa decadanan largo pa compania.