E DI 5 E-ARUBA BUSINESS SEMINAR TA 11 DI JUNI 2022

Aruba ta anticipando e siguiente edicion di un di e seminarionan mas grandi cu Aruba a experencia. Ta trata aki di e e-Aruba Business Seminar. Esaki lo tuma luga dia 11 di juni 2022 den Renaissance Convention Center. Durante un rueda di prensa na Aruba Impact Co Working Space a anuncia cu esaki lo ta e di cinco edicion, pues sigur un motibo pa celebra. E-Aruba Business Seminar ta un seminario di mita dia unda varios  profesional di Merca y Europa ta bin Aruba pa asina papia riba diferente topico. Mayoria biaha riba topico cu tin di haber cu mercadeo (social) y transformacion digital.

E edicion aki ( Promer Lustro) lo toca e temanan manera “social media”, “customer service”, “company culture”, “e-commerce” y “digital marketing” en general. For di Merca lo t’ey presente Ryo Zsun. Ryo tin e titulo di Culture Maestro na e compania renombra Zappos cual awor ta propiedad di Amazon. Zappos ta conoci pa tin un cultura di negoshi hopi positivo y Ryo ta encarga cu esaki. E lo papia riba con imporante e ta pa tin un bon cultura den cada organisacion y tambe con pa traduci esaki den un bon “customer service”. For di Merca tambe lo t’ey presente Carlos Gil. Carlos ta un consultant renombra cu a traha p’e companianan manera Linkedin, Win Dixie, Wendy’s y otronan. Tambe e ta un “Best Selling Author” cu su buki The End of Marketing. E lo papia rib’e tendencianan di social media pero tambe lo inclui informacion relaciona cu NFT’s.  For di Paris lo ta presente Timo Raab. Timo ta e ‘Global Head of e-Commerce pa L’oreal’. Timo lo elabora riba e ultimo tendecianan den e mundo di e-commerce. Manera tur edicion, despues di cada session, lo tin un panel unda cu lo combersa cu e expertonan local riba e materia. Pa Aruba Diederik Kemmerling di The Lab agency tambe lo elabora riba e cifranan y tendencianan di social media di Aruba. Sr. Pierre Rafini, Vice president Business Banking Dutch Caribbean & Country Manager Aruba pa RBC como sponsor a splica di ta orguyoso di ta un partner di e evento aki. Mirando cu e banco ta ofrece varios producto pa empresarionan haci negoshi online, e seminario ta un bon fit pa nan como banco.

Entrada pa e seminario den su fase early-bird ta costa 125 florin pa persona y lo ta obtenibel na Superfood for di diamars en adelante y tambe online via www.e-aruba.com. Pa companianan cu kier cumpra mas cu 5 ticket, por haci esaki via earubaseminar@gmail.com.

Un danki na tur e patrocinadonan cu ta haci esaki posibel; RBC Royal Bank, Fast Delivery Services, Guardian Group, Digicel Business, Remax Aruba, Qredits, CICC, Fun Miles, FCCA, Click Print, Motus Minds, Aruba Renaissance Hotel & Resort, Aruba Chamber of Commerce y Elite Productions & Entertainment.

e-Aruba Seminar ta produci pa Infinity Media Aruba y The Lab.