17 di mei Dia Internacional di Hipertension

ORANJESTAD, Aruba

Diamars 17 di mei ta Dia Internacional di Hipertension. Hipertension ta e termino cu ta wordo utilisa pa describi presion arterial halto. Un persona cu presion arterial halto, sin tratamento, por sufri di hopi consecuencianan medico. Por ehempel, malesanan di curason y ader, stroke, problema cu riñon, problema cu wowo, y otro problemanan di salud.

Minister Oduber a splica cu e programa aki ta parti di su maneho di Salud Publico cu ta basa riba prevencion. Tambe e ta parti di e Plan Nacional di Prevencion di malesanan NCD’s cu ta wordo realisa door di e stuurgroep cu ta consisti di diferente stakeholders conhuntamente cu PAHO. Ministerio di Salud Publico sa cu e causa di hipertension ta hopi compleho y pa logra un cambio y solucion nos lo mester traha consistente riba consientisacion, educacion y actua hunto pa logra esaki. E meta ta pa a largo plaso reduci e gastonan di AZV door di prevencion.

E malesa aki ta un malesa silencioso. Es decir cu hopi hende no sa mes cu nan ta sufri di dje. Pa es motibo aki, Departamento di Salud Publico conhunto cu Ibisa tin e campaña “Sa bo numbernan”. E campaña aki kier enfatisa e comunidad pa tuma iniciativa y nan responsabilidad social, pa midi nan presion regularmente na cas. Minister a menciona cu ta hopi importante pa educa nos mes den area di movecion, nutricion y yuda otro nan tambe den e oportunidad di por biba un bida mas saludabel.

Un par di punto pa preveni presion halto ta: haci actividad fisico regularmente, limita alcohol, stop di huma, baha man na salo y cuminda vet.

E campaña “Sa bo numbernan” a wordo realisa danki na e bon cooperacion cu tin entre Ministerio di Salud Publico y Ministerio di Deporte, un danki special na e team di DVG y Ibisa cu a haci esaki posibel. Minister Dangui Oduber ta pidi comunidad pa buska mas informacion ariba e tema di hipertension y no lubida cu bo mes por tuma bo presion na cas mes pa bo sa bo number.