Parlamentario Shailiny Tromp-Lee (MEP):
Mi a keda encanta cu e concepto nobo di olimpiada escolar, WE Aruba
ORANJESTAD, Aruba
Diabierna ultimo, dia 13 di mei 2022, Weganan Escolar den un bachi nobo a wordo lansa, WE ARUBA. Alabes nos a sera conoci cu e mascota di e weganan, esta WÉWÉ. WÉWÉ ta representa un prikichi cu ta un parha hopi conoci, y cu pa e weganan lo bay ta hopi cariñoso, stimando nos muchanan y sigur ta bay trece alegria cerca nos nan durante WE Aruba.
Mi a encanta e bachi nobo cu Olimpiada Escolar a haya. Tremendo renobacion di e concepto, y mi ta sigur si nos tur apoya esaki e lo ta un exito rotundo. Nomber nobo, jingle, promo, mascota, programa pa scol preparatorio, basico y avansa, un apertura cu ta premira di bira algo excepcional bou coordinacion di JF Montoya di DCA, uniform pa tur scol, premionan atractivo (te cu Awg. 7.500,-) y mucho mas. Mi a keda berdaderamente encanta. Sigur e formato a manda mi den mi recuerdonan caminda den pasado nos tabatin stadion y veldnan yen durante Olimpiada Escolar. Mucha y maestronan di scol, mayor y famianan tur apoyando nan deportistanan y creando un dushi ambiente. Un ambiente di union y competencia deportivo, midiendo forsa riba tereno y tambe di apoyo y tur cu e deseo pa gana. Mi ta anhela pa experencia esaki atrobe.
Laga nos tur reserva den agenda dianan 17 pa 25 di Juni binidero y ban sostene nos mucha y hobennan. Lo tin competencia pa alumnonan di scol preparatorio, basico y avansa, den ocho diferente disciplina.di deporte. Scol preparatorio lo participa den ‘kids run’ y ‘kids athletics’. Scol basico lo competi den futbol, volleyball, basketball, beach tennis, badminton, dammen y ‘kids run’. Scol avansa ta participa den baile deportivo y baseball.
Nos tur tin yiu, nieto(a), subrino(a), iha etc. Ban durante e siman aki apoyanan of nan scol y haci WE Aruba algo grandi. Ban aporta na logra un di e metanan di WE Aruba cu ta pa promove deporte bou di nos alumnonan di scol preparatorio, basico y avansa. Ban brinda deporte e oportunidad pa enberdad ta un motor pa crea amistad, forma futuro lidernan pa nos comunidad, fomenta caracteristicanan positivo y crea nucha y hobennan mas sano.
Di awor caba mi kier a felicita y gradici tur scol y maestro pa nan participacion y dedicacion. Un aplauso pa boso. Mi kier a termina cu palabra di pabien na Minister Endy Croes, IBiSA y DCA pa e concepto nobo aki y deseanan tur clase di exito cu e preparacion y organisacion pa WE Aruba 2022.
