APERTURA DI CAROSAI EXITOSO CU ASISTENCIA DI VARIOS PARTICIPANTE INTERNACIONAL

ORANJESTAD, Aruba

E siman aki a tuma luga e apertura oficial di e di 12 congreso CAROSAI, cu a conta cu presencia di diferente dignitario di diferente pais. Sra. Croes – Williams, Voorzitter di Algemene Rekenkamer y alabes Voorziter di CAROSAI pa e proximo 3 añanan, a expresa cu tur cos a bay bon cu e apertura di e congreso y a splica un tiki di locual lo tuma luga e siman aki.

Na apertura di e congreso CAROSAI a conta cu presencia di Gobernador, Prome Minister, y diferente Parlamentario. Banda di diferente discurso, tambe a tuma luga un ‘Parada di Bandera’ cu banderanan di e 23 paisnan cu ta forma parti di CAROSAI.  Mas durante dia, a inicia cu e “panel discussions”, sra. Croes – Williams a splica.

E congreso a inicia un dia anterior, esta diadomingo cu un  actividad di bon bini, dialuna a tuma luga e apertura oficial y lo sigui cu diferente sesion diamars y diaranson, pa despues clausura e congreso diahuebs. “Te ainda tur cos a bay hopi bon y ta contento di mira tanto hende di afo asisti e congreso unda cu nan ta haya tambe un poco sabor di nos calor di Aruba,” sra. Williams a expresa.

Representante di Supreme Audit Institutions (SAI) di Brazil, cu proximamente lo bira e voorziter di INTOSAI na november, a comenta cu e miho cos di Aruba ta su hendenan.

Terminando, sra. Croes – Williams a bisa cu el a keda sumamente contento pa tende e expresionnan aki, cual ta mustra cu banda di cu ta trata temanan hopi interesante, importante y serio, tambe ta duna tur e bishitantenan un toke di e calor Arubiano y di e bunita isla di Aruba.