MINISTERNAN A CHECK NAN PRESION Y A CONOCE NAN NUMBERNAN

ORANJESTAD, Aruba

Riba Dia Internacional di Hipertension, 17 di mei, Ministernan di Gabinete Wever-Croes a uni nan mes na e campaña ‘Conoce bo Number’ di Departamento di Salud Publico Aruba (DVG) hunto cu IBISA. Un programa di salud cu ta basa riba prevencion di consecuencianan medico cu por surgi di presion halto si un persona no ricibi tratamento.

Diamars mainta, Ministerio di Salubridad, a organisa un dia special na Bestuurskantoor pa duna Ministernan y empleadonan di e oportunidad pa pasa check nan presion. Docter Gerrit Croes y señora Dahariana Evertsz di Health Promotions a tuma presion di ministernan. Prome Minister Evelyn Wever-Croes a wordo atendi e mainta aki pa colega di Partido MEP, Docter Gerrit Croes. Premier ta contento cu el a Conoce su Numbernan cu ta 110-80 cu ta un indicacion cu nos Prome Minister ta bon di salud pa loke ta trata presion.

Prome Minister ta haci un yamada na cada ciudadano pa ta consciente di su number y check presion debidamente. “Ta importante pa nos check nos presion y sa e numbernan di nos presion pa asina keda gosa di un bida saludabel”, Prome Minister a enfatisa.