KIA A INICIA CU E PROYECTO “SMART CLASS ROOM” PA ASINA OFRECE MAS ACCESO NA LES PA DETENIDONAN
ORANJESTAD, Aruba
Diaranson mainta, durante un sesion virtual, KIA a lansa su proyecto nobo esta e “Smart Class Room” caminda nan lo bay ta brindando les y ta bay haci cuido den e mundo penitenciario mas accesibel pa tur e detenidonan. KIA a percura pa usa un parti di e jeugdafdeling cu no ta wordo usa frecuentemente, pa por duna e lesnan aki. E lokaal aki a wordo ekipa cu tecnologia moderno, pa di e forma aki por brinda les particularmente na nos hobennan, lesnan cu tin nan propio interes, pa nan por participa activamente tambe.
E smart class room ta parti di un plan pa duna cuido na detenidonan na KIA pero tambe facilita y aumenta e acceso di e cuido aki na e detenidonan. E smart class room tin luga pa acomoda cuatro cliente pa les. A dicidi di haci e grupo chikito pa asina disminui e riesgonan di siguridad durante e lesnan. Den e smart class room tin un smart board cu ta facilita e-learning/tele-educacion y “blended learning”. Cada detenido lo tin acceso monitoria na internet pa por usa esaki specificamente pa e les cu nan ta atende. Tur studiante lo tin acceso na un laptop pa por studia nan materia. Banda di esaki ta brinda e detenidonan, cu tawata na scol ainda ora nan a comete nan delito, e oportunidad pa sigui nan scol online.
Como parti di e smart class room, lo bay cuminsa duna les di computer, idioma, landsexamen y cursonan for di diferente plataforma online. Tambe lo brinda lesnan di entrepreunership, small business y budget management. Actualmente, KIA tin un acuerdo cu FEPA pa cuminsa duna diferente les. Banda di esaki tin un “flexplek” nobo cu ta wordo usa como un biblioteca chikito y tambe pa terapia pa e detenidonan.
Por ultimo, minister Tjon a expresa di ta sumamente satisfecho di wak cu FADA tambe a bay duna un charla na nos hobennan pa di e forma aki sigui informanan riba e parti di adiccion y e consecuencianan cu diferente substancianan por tin riba nan bienestar pero tambe riba e parti di salud mental.
