OE AZV: “Relato financiero 2021 ta mustra e retonan pa e siguiente añanan nos dilanti”.

ORANJESTAD, Aruba

Diahuebs 19 di mei OE AZV a presenta e cifranan clave di su relato financiero 2021. Director ing. Edwin Jacobs a elabora extensivamente riba varios cifra manera e  desaroyo di cantidad di aseguradonan, e gastonan di cuido, entradanan, e resultado di e “Wave 5 model”, e gastonan di administracion, e diferente specialismonan y e proyecto plan di implementacion 2022.

Cifranan di mas clave

Si para keto na e cantidad di aseguradonan ta wak un crecemento relativamente stabiel, unda pa ehempel ta mustra cu na 2019 esaki tabata 108897 asegurado y na 2021 tabata tin 106740 asegurado. Un cifra cu ta preocupante ta e aseguradonan 65+, unda ta wak cu di e cantidad total di asegurado, 16.9% porciento ta riba 65 aña. Ta premira cu den aña 2030 lo yega alrededor di 25 pa 30% porciento di persona riba 65 aña.

Gastonan di cuido

E gastonan di cuido tin un bahada leve si wak e gastonan di aña pasa. E mayoria tin di haber cu e recortenan y medidanan cu a tuma relaciona cu e “5-Wave model” y a cera aña pasa pues c;n bahada chikito. Si sigui analisa e gastonan di cuido pero awor pa haya sa kico cada asegurado ta costa; e gastonan di cuido promedio pa cada asegurado a evoluciona di 3463 florin na aña 2012 pa 4195 florin na 2021. E tendencia aki esta cu e gasto di cuido pa asegurado ta bay subi, ta bay keda aumenta den futuro.  

Entradanan prima AZV y BAZV

Pa loke ta e entradanan ricibi for di e prima AZV, aki ta wak cu 2019 tabata un tremendo aña pa OE AZV unda a ricibi 263.6 miyon na entrada na prima, door di covid na aña 2020 el a bay na  222.6 miyon florin pero ta mira un bon recuperacion den 2021 unda e.o door di programanan manera loonsubsidie (pero tambe economia a recupera) y a ricibi 243.4 miyon florin total. E bestemmingsheffing AZV (esta e BAZV), cual ta un componente importante tambe como entrada pa OE AZV, aki ta wak cu e contribucion di no solamente localnan pero tambe di turismo unda nan tambe ta contribui cu pago di BAZV, y OE AZV a ricibi 144.6 miyon florin den 2022 y casi 30% mas esta 186.9 miyon florin den 2021. Aki ta unda señor Jacobs a recorda tur asegurado di e importancia di pidi recibo ora di haci compra como un medio pa garantisa cu e BAZV ta yega na AZV.

Contribucion di Pais Aruba

Pa loke ta e contribucion di Pais Aruba e tabla akibou ta ilustra cu na 2019 Gobierno no mester a duna contribucion (Landsbijdrage) pero ya na 2020 Gobierno di Aruba mester a tuma sosten di likidez (via fiansa cu Hulanda) y sostene e Fondo AZV cu 99.7 miyon. Na 2021 a calcula cu lo tabata tin mester di alrededor di 56 miyon florin na contribucion di Pais Aruba pero esaki door di e crecemento economico acelera, e contribucion di Pais Aruba a keda limita na e suma di 33.9 miyon florin.

E resultado di “Wave 5 model”

Ta importante pa realisa cu e gastonan por a baha cu 1.2 miyon florin den 2021 pero esaki no a sosode pa motibo cu no tabata tin consumo. Esaki ta e resultado di e acuerdo entre Aruba y Hulanda, e asina yama “Landspakket”, unda OE AZV mester a cumpli cu e recorte di 60 miyon pa aña y unda OE AZV a hay’e ta tuma algun medida caba cual a resulta den e reduccion di gastonan. Den aña 2020 a logra reduccion di 35 miyon. Na aña 2021 no a logra e 60 miyon, a logra reduccion di 36.7 miyon. Gran parti di loke a logra reduci tin di haber cu e reduccion di tarifa y presupuesto di sector di cuido (e 5.5% di contribucion di sector di cuido) y pa cual OE AZV ta agradecido, e medidanan cu a tuma pafo di ley AZV manera limitacion di aporte financierio ora bay exterior y temporisacion di cuido (esta unda pa un par di luna AZV no por manda pashent exterior pasobra p.e. Colombia tabata cera).

Gastonan di Administracion

Si mira e gastonan administrativo di OE AZV, aki tambe tin reduccion, esta di 18.2 miyon florin den 2018 pa 16.9 miyon florin den 2021. E suma aki ta inclui e contribucion di e empleadonan di OE AZV.

Gastonan di cuido medico specialisa

Si mira e gastonan di admision y cuido na Dr. Horacio Oduber Hospital, ta wak cu esaki a subi. OE AZV ta paga “lumpsum” esta un suma pa un pakete di servicio. E desaroyonan mas importante tabata un capacidad limita di cuido intensivo debi na covid, limitacion di cuido electivo, lista di espera mucho largo y no tabata tin mucho data disponibel pa AZV. Esaki ta algo cu lo mester haya atencion den añanan nos dilanti; esta pa haya miho bista kico tur nos ta paga pa e 179.7 miyon florin cu ta paga na hospital.

Gastonan di cuido medico den exterior

Akinan por wak cu compara cu 2019 unda a saca 57.6 miyon florin. Aña pasa tabata 27.0 miyon.  Akinan tin cu tene cuenta cu dos desaroyo hopi importante. Pa motibo cu Colombia a cera, mester a referi casonan pa Hulanda unda gastonan a subi pa motibo cu cuido na Hulanda ta mas halto, pero di otro banda locual a reduci gastonan den 2021 tabata e inicio di tratamento cu radioterapia na ImSan aki na Aruba mes.

Gastonan di medicamento (remedi)

Gastonan di remedi ta mustra un desaroyo basta constante. Alrededor di casi 59 miyon florin pa aña den e ultimo tres añanan. Den 2021 e tabata 58.5 miyon florin. Locual tabata un desaroyo tabata cu pa 1 luna a introduci e cambio den lista di remedi pero despues esaki a wordo posponi. Awor ta den otro version di trayecto pa implementacion pero canando e  trayecto aki hunto cu e stakeholdersnan.

Gastonan di ImSan

Pa ImSan ta conta igual cu Dr. Horacio Oduber Hospital. Esta cu OE AZV ta paga un lumpsum y ta haya diferente servicio pa esaki, entre otro di ambulance, tratamento pa wowo y dialyse. Na 2020 a trata caba algun asegurado via radioterapia y na 2021 a sigui. Loke ta trata desaroyonan, aki por wak cu tin e “omgekeerde Uitzendingen”  unda antes tabata manda asegurado exterior pa cierto tratamento, awor esaki por na Aruba por ehempel pa ‘strabismus’ (operacion di wowo skel). Adicionalmente a habri 22 cama tipo ‘short stay’ na ImSan.

Gastonan di Laboratorio y Dokter di Cas

A sigui elabora riba gastonan di laboratorio unda no a wak mucho cambio, e gastonan ta keda alrededor di 25 miyon florin pa aña. E gastonan di dokter di cas ta compara cu añanan prome ta menos, un reduccion entre otro door di introduccion di Cas di Dokter (HOED). E formula di HOED, esta mas dokter di cas bou di un dak sigur lo sigui stimula pa asina yega na mas dokter di cas. A contrata cu e prome dokter di cas via ARU-BIG y tin 4 dokter den opleiding pero asina mes e topico dokter di cas esta haya dokternan di cas ta keda un reto/desafio.

Gastonan relaciona cu COVID

Pa loke ta e gastonan relaciona cu COVID, por menciona cu den 2020 a uza 25.1 miyon florin y den 2021 esaki tabata 18.3 miyon florin. E gastonan den 2021 tabata primordialmente pa hospital, cuido medico den exterior (cuido medico relaciona cu COVID na Bucaramanga) y testnan PCR (di cual e ultimo tin cu wordo mira como gastonan ‘negativo’ ya cu tin un palabracion haci cu e sector cu e gastonan aki (“ganashi aki”) mester bay bek den cuido).

Specificacion di tur gasto

OE AZV a presenta den un solo tabla e desaroyo di gastonan di 2017 te cu 2021. Tur esnan interesa pa haya sa mas por profundisa den e tabla akibou of pa lesa ful e relato financiero 2021 por bay riba e website di OE AZV; esta www.azv.aw y download e relato financiero 2021 bou di e bloke Relatonan Financiero 2021 den e homepage (scroll abou na bloke Relatonan Financiero).