DVG ta sigui desaroyo internacional riba Monkeypox
Mientras ta organisa contacto y activa sistema di vigilancia
ORANJESTAD, Aruba
Desde 13 di mei casonan di e virus cu ta ocaciona Monkeypox of tambe yama Apenpokken na Hulandes, ta wordo raporta na World Health Organisation (WHO) for di paisnan no endemico pa e virus aki. Cu otro palabra e virus aki ta wordo detecta na paisnan unda normalmente e no ta wordo encontra. Loke mas ta hala atencion di Organisacionan Mundial di Salud ta e hecho cu mayoria di e casonan raporta no tin un historia di biahe tampoco pa un pais unda e virus normalmente ta ser encontra. Monkeypox normalmente por ser encontra den diferente cuidad di Africa, pero recientemente mas di 12 pais a raporta casonan aisla di e virus.
Como pais turistico Aruba ta sigui e desaroyonan internacional aki di serka. Den cuadro di esaki Departamento di Salud Publico a cuminsa reforsa nan sistema di vigilancia y monitor pa si posibel caso por presenta. Tambe a cuminsa organisa contacto cu organisacionan di salud local y internacional pa delinia maneho.
Sintoma
Monkeypox ta wordo categorisa como un virus cu ta causa sintoma leve. Pa e grupo di riesgo, cu ta mucha, hende muhe na estado of persona cu sistema inmunologico comprimi, e virus por ta peligroso te asta mortal.
Sintomanan ta cuminsa cu keintura, dolor di cabes, kliernan hincha y dolor di curpa. Entre 1 te cu 3 dia despues di e keintura, ta aparece un rash cu den mayoria di e casonan ta afecta cara, mannan y pianan. E rash na su turno ta transforma den blaar cu pus aden. Monkeypox por wordo confundi cu otro malesanan manera Smallpox, Bruela, of Impetigo, pa cual motibo ta importante pa un persona cu e sintomanan aki tuma contacto cu nan dokter di cas pa testnan nesesario wordo haci y asina wordo corectamente diagnostica.
Contagio
Contagio cu Monkeypox den paisnan no endemico, ta sosode di hende pa hende pa medio di contacto directo (close contact) cu un persona infecta. Esaki por sosode atravez di particulanan (droplets) cu e persona infecta, ora di tosa of nister.. Tambe bo por keda infecta door di tin contacto cu e likido prosedente di e blarnan presente serca e persona infecta (skin to skin of panja contamina).
Tratamento y vacuna
Pa Monkeypox vacuna no ta disponibel, aunque a wordo menshona cu e vacuna contra smallpox lo tin cierto grado di eficacia p’esey prevencion ta importante. No tin tratamento disponibel, unicamente tratamento di sintoma. E ta desaparece entre 2 pa maximo 3 siman.
Medidanan di hygiene
Evita contacto cu hende cu ta sinti malo y laba man regularmente. Na momento cu bo a wordo diagnostica cu Monkeypox bo lo wordo pidi pa bay den den isolasion.
Pa mas informacion sigui nos riba Facebook page Directie Volksgezondheid DVG Aruba, subi nos website www.dvg.aw of yama nos na 5224200
