Minister di Finansa ta comparti informacion treci durante e encuentro cu Hefenan di Departamento riba Landspakket y E-government
ORANJESTAD, Aruba
Durante e encuentro cu Hefenan di Departamento di Gobierno, sra. Indra Zandaam di Ministerio di Finansa a brinda informacion riba e trabounan cu ta wordo haci den cuadro di e Landspakket y tambe riba e avansenan riba e tereno di e-government.
Landspakket
Pa locual ta landspakket a para na e escencia di trayecto y mecanismo di traha. Sra. Zaandam a splica riba e reformanan cu a wordo acorda cu Hulanda 13 di november 2020, a wordo traduci den diferente “uitvoeringsagenda” y den cada kwartaal por wak e progreso di diferente reforma cu pais Aruba. Tambe a duna informacion relaciona cu e aspecto di “uitvoeringsrapportage”, cu ta evaluacion oficial di Tijdelijk Werkorganisatie Nederland, pa locual ta cumplimento di Aruba pa locual ta Acuerdo di Paris. A indica cu e “uivoeringsrapportage” ta escencial pa toma di decision riba nivel di Conseho di Minister di Reino. Ademas a duna informacion pa locual ta e forma di traha y cu e ekipo di Aruba ta cumpliendo den e forma akinan. Aruba tin un Tijdelijk Werkorganisatie Aruba cu ta partner cu e Tijdelijk Werkorganisatie Nederland. Tambe a menciona cu Aruba tin un ekipo estrecho di nos expertonan di sector publico y conseheronan cu ta trahando duro pa keda cumpli cu e reformanan acorda cu Hulanda. Y por bisa cu ta haci esaki exitosamente. E landspakket tambe ta un muestra di e potencial y e forsa di e aparato gubernamental di pais Aruba.
E-government
Sra. Zaandam a brinda informacion tambe riba e E-government Roadmap. Dia 24 di september 2021, pais Aruba a publica su vision pa locual ta mehoracion y optimalisacion di servicionan gubernamental den gobierno. Por medio di un projectmanagementteam a identifica proyectonan escencial cu pais Aruba lo por eherce of sigui haci investigacion cu ta conduci na e mehora e servicio di gobierno. Tambe a splica cu e combinacion di e trayecto di optimalisacion via e
landspakket y digitalisacion via e-government ta yuda pa acelera e diferente reforma nan cu ta necesario pa haci nos pais mas fuerte y resiliente.
FIN
2022MEI23-01
