Minister Xiomara Maduro di Cultura: E informacion cu Archivo Nacional Aruba ta warda ta di gran importancia pa tur esnan cu ta haci investigacion

ORANJESTAD, Aruba

Durante e conferencia di Prensa na ANA e minister encarga cu cultura a trece dilanti cu e informacion cu Archivo Nacional ta warda ta di gran importancia pa tur esnan cu ta haci investigacion, pa alumno-, studiante-, profesional- y personanan cu kier sa di nan generacion genealogico (stamboom), resumen di famia y hopi mas. Ta masha importante pa nos preserva nos historia pa aki 40, 50 aña pa asina nos futuro generacion sa con nos a biba.

Minister Maduro a expresa su gratitud na un y tur cu a coopera cu e campaña aki. Un di esnan cu e mandatario a menciona ta Sr. Dufi Kock, cual ta un eminente memoria di nos pais, un di e caranan conoci y cu ta bin haci uzo di e archivonan di ANA. Danki tambe na tur otro cu ta colabora y cu lo ta den diferente media proximamente. Tambe e mandatario a trece dilanti cu Archivo Nacional Aruba – ANA tin un amiga ADA, Amigonan Di Archivo, boluntarionanan cu ta yuda ANA den organisamento di varios actividad, entre otro e tremendo exposicionnan cu ANA ta hopi conoci p’e. Un danki na tur pa nan bunita colaboracion.

Minister Xiomara Maduro ta invita comunidad pa apoya e campaña 3C -TRECE y trece materialnan historico durante oranan di oficina na ANA y na e Open Dag diasabra dia 11 di juni for di 10’or di mainta pa 2’or di merdia. Por ultimo e mandatario a desea gerencia y personal di ANA hopi exito cu e actividadnan durante Siman di Archivo 2022 y e Campaña 3C – TRECE. Archivo ta nos herencia cultural, archiva nos historia ta importante pa nos tur. Ban laga nos historia pa asina nos futuro generacionan por haya sa con nos a biba aki na Aruba.