Parlamentario Alvin Molina (MEP): Reunion di Comision Fiho di Husticia a para keto riba e topico: Castigo penal pa menor di edad

ORANJESTAD, Aruba

Ultimo temponan aki tin un preocupacion den comunidad tocante e aumento di criminalidad, vooral bou di nos hobennan. Mi ta consciente cu tin e pensamento bou di nos comunidad cu kisas nos leynan ta mucho suave pa cu menornan di edad cu comete un delito severo y cu pesey nan no ta worry si nan comete un acto penal of no. Cu esaki den mente mi a dicidi como president di Comision Fiho di Husticia pa organisa un serie di reunionnan cu diferente stakeholders importante cu ta traha pa proteha, guia y coregi nos hobennan.

Sancionnan alternativo

Siman pasa nos a cuminsa cu e prome reunion unda a reuni cu representantenan di Stichting Reclassering en Jeugdbescherming, Directie Sociale Zaken y KIA. E reunion a cuminsa cu un presentacion di e tres departamentonan. Loke tur tres ta menciona ta cu hisa e añanan sera den KIA no ta e solucion pa baha criminalidad, sigur no pa nos hobennan. Sera mas hoben lo solamente contribui na hisa gasto di pais Aruba mirando cu un detenido ta costa pueblo Afl. 96.752 pa aña. Locual cu si a bin dilanti como posibel solucion pa reduce criminalidad ta cu mester traha riba strafnan alternativo manera electronisch toezicht y HAlt.

Prevencion

Den e ultimo 3 aña casonan unda hobennan ta envolvi den actonan penal a baha un tiki, e problematica di ‘gang’ si a aumenta bek. Akinan e palabra ‘prevencion’ ta bira central. Tur organisacion a menciona cu prevencion ta e solucion mas eficiente, menos costoso, cu lo por ‘sera e cranchi di first offenders’ y tambe preveni pa esnan cu ya caba a comete un acto penal sigui bay den e caminda robes.

Colaboracion

Manera mi mes a experencia como polis y loke sigur mi ta kere den dje ta cu siguridad na Aruba por wordo logra ora tin un bon colaboracion entre departamentonan di husticia, area social y enseñansa. Tin un responsabilad grandi den esaki pa comunidad en general, iglesianan, centro di bario, clubnan deportivo, organisacionnan di cultura, comercio et cetera. Recursonan ta schaars y lo keda schaars pa awo. Kiermen nos TIN cu inverti mas tanto posibel den nos capital humano cu den e momentonan aki; bedrijfsvoering y especialmente personeelszorg pa esnan cu berdaderamente ta duna e servicio na pueblo.

Siguientemente nos lo continua cu e serie di reunion unda nos lo tin KPA, DWJZ y Ministerio Publico cu nos. Na final di e serie di reunionnan aki, como presidente di e comision, lo mi percura pa manda un carta pa e mandatarionan concerni cu tur punto y recomendacionnan cu a keda treci padilanti, pa busca e forma di con lo por incorpora esakinan den e maneho.