E aña aki ta di 58 aña cu ta celebra Dia di Portugal, Dia di Luis Vas de Camoes y Dia di Comunidad Portugues rond mundo na Aruba cu Santo Sacrificio di Misa

nos ta recorda e di 58 aña di existencia di e celebracion aki, unda na aña 1965 Sr. Aventura Quimarais a tuma e iniciativa pa e tempo ey celebra dia di Portugal conhuntamente cu un grupo di portuguesnan na Aruba. E celebracion a inicia cu un marcha saliendo for di cas di Sr. Aventura riba Wilhelminastraat pa Wilhelmina Park.

E grupo di Portguesnan aki cu tawata masha uni den un forma hopi emocional a bini hunto p’asina gradici Aruba pa e bon aceptacion di e Portuguesnan na Aruba.

Portuguesnan ta conoci di ta hende cu ta traha duro y lucha te na final. Nan a contribui na  economia di Aruba den añanan 60, 70 ,80 ,90 y te cu dia di awe. Tambe nan tawata conoci pa haci trabounan duro y hopi pisa.

E Portuguesnan tabata busca un futuro pa nan mes y nan famia y no tabata importa e trabou. Pa nan tabata mas importante e dignidad di por tin un trabou y cu un dia nan lo logra.

Pa algun di nan, esaki tabata un cos no mucho bon pa haci, pero a sali fo’i nan pais pa traha y gana algo pa bay cas bek cune, y no pa keda semper. Esaki tabata e deseo di mayoria di nan. Pero cu transcurso di tempo cosnan a cambia.

Asina tambe e Portuguesnan poco poco a cuminsa integra mas y mas den e sociedad Arubano na unda nan a eherce diferente funcion den comunidad, educa nan famia y ainda nan ta aki of asta a ser dera riba e dushi isla di Aruba.