TROCEMENTO DI PALABRA NO TA BAY MAN DEN
MAN CU INTEGRIDAD
ORANJESTAD, Aruba
Advertisements
| TROCEMENTO DI PALABRA NO TA BAY MAN DEN MAN CU INTEGRIDAD ORANJESTAD: Durante e conferencia di prensa di dialuna ultimo e Prome Minister di Aruba, sra.mr. Evelyn Wever Croes a demostra un bes mas e relacion SOLIDO entre su persona y TROCEMENT’I PALABRA. E Prome Mandatario den su ansha politico pa desacredita Fraccion di MAS a indica den su Conferencia di prensa cu Fraccion MAS no tabata mucho contento y cu nos posicion ta cu nos tin cu haya e recorte di 25% bek pa e trahadonan publico y semi-publico por haya nan 5%. Na varios ocasion no solamente Fraccion di MAS, pero Prensa Arubano a constata cu nos Prome Ministro ta troce palabra y ta informa pueblo e parti cu ta cumbini su persona so. Posicion di MAS E posicion cu Fraccion di MAS a tuma y a trece padilanti durante e reunion di Comision Central di 23 di mei ultimo ta lo siguiente: Fraccion di MAS a duna di conoce di no ta di acuerdo pa sigui mantene e recorte di 25% riba entrada di Parlamentarionan. Nos Fraccion ta di opinion cu ora a aplica e reduccion riba entrada, esaki a sosode na forma simultaneo cu e trahadonan publico y semi publico. Na nos opinion e reduccion di e medida tambe mester keda aplica na forma similar (analogico). Fraccion di MAS no ta e unico cu tin e opinion ey den Parlamento. Fraccion di RAIZ a sostene nos posicion y tin e mesun pensamento, pero ta straño cu e Prome Mandatario no a ataca nan. Tin dos parti di e conferencia di prensa cu ta hopi preocupante, pero como cu ta trata di Prome Minister, no ta pa uno keda asombra si: 1. E prome ta cu a reuni den Conseho di Minister y nan a bay di acuerdo pa sigui mantene e recorte di 25%, mientras cu tabatin diferencia di opinion entre e propio Ministernan di Gabinete Wever-Croes, pero e Prome Minister no tabata kier ta honesto y transparente cu pueblo, ya cu e no tabata kier pa Pueblo sa esaki, apesar cu nan a yega na un consensus despues. 2. E di dos ta cu conforme nos Constitucion, Ministernan mester responsabilisa nan mes na Parlamento y no ta asina cu e Prome Ministro ta hefe di e Parlamentarionan. E hilaridad den e expresion haci ta cu ta depende con biento ta supla e Prome Minister ta pone e hiërarchia den practica durante su disertacionnan den sala di Parlamento. Prome Minister ta troce e berdad ya cu no ta 3 condicion Hulanda a pone sino 8! Pakico Prome Minister mester sconde e condicionnan cu Hulanda y su persona a conveni pa Parlamento? Pakico ta via di Prensa Parlamentarionan mester bin haya sa cu tabatin mas condicion stipula pa empleadonan publico por haya bek e recorte salarial considerando cu atrobe door di engaño di Prome Minister a bin haya sa cu NO tabata pa FASE so a uza e recorte salarial? E realidad ta cu Gabinete Wever-Croes den su desesperacion pa tapa y trata di manipula CAft indicando cu el a baha gastonan di personal manera conveni den e Protocol cu Prome Minister di Aruba, sra.mr. Evelyn Wever Croes y Minister di Finansas, sra.mr. Xiomara Maduro a firma y acorda na November 2018. Pero cu te dia di awe nan NO a cumpli cu ne y pa e motibonan aki tambe CAft a hala nan atencion un biaha mas den nan consehonan di 10 di mei ultimo. Fraccion di MAS ta haci un apelacion na Prome Minister pa por fabor haci un esfuerso grandi pa durante su Conferencianan di Prensa siña papia e berdad y stop di troce palabra y engaña pueblo djies pa pasa pa “integro”, un palabra cu no ta cuadra cu expresionnan di su persona. ////// | |
