Minister di Cultura ta informa:
Un paso mas pa e proyecto ‘Manteniendo herencia bibo den tempo’ den compleho Ecury
Un inversion importante na bienestar di cultura di Aruba
ORANJESTAD – E etapa concerni ta encera mantencion grandi y adaptacion di tres edificio monumental cu ta forma e fachada di MANA (Museo Arqueologico Nacional Aruba). Ta trata di Cas Dundun, un hoya di edificio cu ta icono pa Playa. Tambe e Cas di Cunucu y Fruteria lo conoce un bachi nobo. Tur esaki danki na un aporte financiero riba 1 miyon florin financia pa UNOCA y Ministerio di Cultura. Un inversion importante na bienestar di cultura di Aruba.
Banda di e trabou di mantencion, MANA hunto cu curador Heronimo ta desaroya dos exposicion nobo. Un lo enfoca riba e contribucion di famia Ecury den desaroyo di Playa y Aruba. E otro lo enfoca riba balornan significativo durante e diferente epocanan di Aruba. Parti di e exposicionnan nobo lo ta documentarionan audio visual bou encargo di Rebecca Roos Productions. Meta ta pa tur e trabounan aki keda cla den prome mitar di 2023.
Cu e inversion aki MANA ta duna contenido na e definicion nobo di museo cu UNESCO ta promoviendo. Museo como aliado den desaroyo di comunidad y un agente social y di cambio. Banda di investigacion cientifico, y educacion continuo MANA ta fortifica su contribucion na experencia turistico unico.
Minister Maduro ta gradici e ekipo di MANA, curador Heronimo, Oficina di Monumento, UNOCA, Van Kessel y Ace Firm Engineering pa hunto haci posibel pa por cuminsa cu e trabounan di mantencion. Minister Maduro ta confia riba bon boluntad di tur involvi pa logra e gran meta di Mantene nos Herencia Cultural bibo.