IBiSA ta informa: 

Spaar placa ora di bay supermarket

Prijs ta subi tur caminda rond di nos, di nos cuminda tambe. Con cu bo bir’e, nos mester come saludabel pa cuida salud di nos famia. P’e motibo aki IBiSA kier comparti algun tips pa yuda spaar placa y mantene bo salud na momento di haci compras na supermercado.

• Prome cu bo sali pa bay supermercado traha un lista di locual bo mester y mantene bo mes na dje. Evita di cumpra ‘snacks’ manera e.o. chips, cuki, ijscream, cu ta innecesario, hopi costoso y no ta saludabel. ( traha un chips na cas cu tortilla)
• Bestel online si esaki ta un posibilidad pa bo. Evita tentacion di cumpra otro product na momento di cumpra den supermercado.
• Come prome cu bo bay supermercado.
• Haci compras bo so, sin pareha y/of yiu(nan). Hopi biaha nan ta piki cosnan extra pone den e garoshi.
• Evita productonan “kant en klaar” den paki cla pa hasa. Productonan hopi procesa ta costa mas. Scoge p.e. pecho di galiña na luga di chicken nuggets.
• Tira un bista riba social media, den corant of flyer y den supermercado mes pa producto cu bo mester na prijs reduci. Adapta bo lista si mester.
• Compara prijs, oferta y specials (p.e. carchi cliente pa spaar) di diferente supermercado y haci bo escogencia.
• Cumpra producto local cu (mayoria biaha) ta na un miho prijs.
• Fruta y berdura frozen ta un bon opcion y nan tin un bon prijs. Nan balor nutritivo ta comparabel cu e fruta of berdura fresco.
• Si bo tin e espacio, cumpra producto na grandi (bulto/bulk) y warda nan debidamente (p.e. saco di siboyo, caha di pia di galiña). Por cumpra hunto pa mas famia y ta comparti e gastonan.

Kisas bo mes tin algun punto cu bo por aplica pa baha gasto di cuminda ora di bay supermercado. Pone mas atencion na locual cu bo mester y cumpra consciente. Lo bo ripara cu e gasto di cuminda ta baha.

Corda keda mantene un bon custumber di come y pone bo salud y esun di bo famia semper na prome luga.