DEPARTAMENTO DI CULTURA CU PRESENTACION PA MUCHANAN DI SCOL PA FIESTA DI SAN JUAN – DERA GAY
ORANJESTAD, Aruba
Despues di 2 aña di pandemia, e aña aki Departamento di Cultura Aruba por a cuminsa organisa bek presentacionnan escolar relaciona cu Fiesta di San Juan – Dera Gay y esaki ta tuma luga dianan 13, 14, 15, 16, 21, 22 y 23 di juni pa un total di 39 scol preparatorio/basico na Cas di Cultura.
Tur dia tin dos presentacion na Cas di Cultura pa muchanan di scolnan preparatorio y esnan di scolnan basico te cu di 3 klas. E programa ta contene ambiente musical, demostracion di baile di wals, splicacion di bombero y historia di San Juan y su baile. Durante e programa tin pa e muchanan competencia di baile, rancamento di bandera, grito di galiña y di gay. Tambe e scolnan presente ta ricibi e “Caha Sabi” cu articulonan di celebracion di Fiesta di San Juan.
E meta di e presentacionnan aki ta pa nos muchanan sera conoci cu e fiesta di San Juan – Dera Gay y asina nan ta mas involvi cu nos cultura y nos tradicionnan. Ademas Departamento di Cultura lo bishita dia 17 y 20 di juni de demas scolnan pa asina nan tambe por ricibi e caha “Caha Sabi”, cual ta contene un calbas, e paña cu ta wordo usa pa tapa wowo y e palo cu ta baila cu ne. Tambe informacion di historia di celebracion di San Juan, buki di Wantomba y buki Fiesta di Dia di San Juan – Dera Gay, un usb cu cancionnan y video di San Juan cu por pasa pa e muchanan na scol.
Di e forma aki ta keda educa nos muchanan riba nos fiestanan cultural tradicional.
Minister di Cultura ta desea pa tur muchanan di scol disfruta di e presentacionnan y un danki na Departamento di Cultura pa organisa esaki.
FIN
22JUNI6-02
